RAMS Qazaqstan قۇرىلىس كومپانياسى 40 قاباتتى Beyond Almaty كەشەنىن سالۋ جوباسىنا قاتىسۋدان باس تارتتى، دەپ حابارلايدى Dalanews.kz.
تۇرعىن ءۇي سالۋشىنىڭ رەسمي سايتىندا جاريالانعان مالىمدەمەگە ساي، كومپانيا 2025 جىلدىڭ قىركۇيەگىنەن باستاپ جوبانى جۇزەگە اسىرۋعا قاتىسۋشىلار قاتارىنان باس مەردىگەر رەتىندە شىعۋ تۋرالى شەشىم قابىلداعانى ايتىلعان.
— كومپانيا ديەۆەلوپمەنت سالاسىنداعى باسقا دا ماڭىزدى باستامالاردى جۇزەگە اسىرۋدى جالعاستىرىپ، ساپانىڭ جوعارى ستاندارتىن جانە تۇراقتى دامۋ قاعيداتتارىنا بەرىكتىگىن ساقتايدى، — دەپ اتاپ ءوتتى RAMS Qazaqstan.
ايتا كەتەتىن بولساق، RAMS Beyond كومپانياسىنىڭ تيميريازيەۆ كوشەسى مەن سەيفۋللين داڭعىلىنىڭ قيىلىسىندا سالىنۋى جوسپارلانعان 40 قاباتتى مۇنارا جوباسى بۇعان دەيىن كەڭ قوعامدىق رەزونانس تۋدىرعان ەدى. تۇرعىندار سەيسميكالىق ءقاۋىپتى ايماقتا مۇنداي بيىك نىساننىڭ سالىنۋى كولىك كوللاپسىنا اكەلۋى مۇمكىن جانە ينجەنەرلىك جەلىلەرگە قوسىمشا سالماق تۇسىرەتىنىنە الاڭداۋشىلىق ءبىلدىردى.
