قاراعاندى وبلىسىنىڭ وساكاروۆ اۋدانى اكىمدىگىنە قاراستى مەكەمە جاڭا جىلدىق شىرشا ويىنشىقتارىن ساتىپ الۋعا بيۋدجەتتەن 3 ميلليون 767 مىڭ 900 تەڭگە جۇمساماقشى.

Dalanews.kz رەداكسياسى مەملەكەتتىك ساتىپ الۋلار پورتالىنداعى قۇجاتتارعا شولۋ جاساۋ بارىسىندا شىعىنداردا كۇمان تۋدىراتىن باعا ايىرماشىلىقتارىن انىقتادى. سەبەبى تاۋارلاردىڭ قۇنى قاراپايىم اۋدان بيۋدجەتى ءۇشىن تىم قىمبات ەكەنىن بايقاۋعا بولادى.

تاپسىرىس اۋدان اكىمدىگىنە قاراستى وساكاروۆ اۋدانى مادەنيەت جانە تىلدەردى دامىتۋ ءبولىمىنىڭ “اۋداندىق مادەني-ساۋىق ورتالىعى” كوممۋنالدىق مەملەكەتتىك قازىنالىق كاسىپورنى ارقىلى جاريالانعان. كەلىسىمشارت 2025 جىلدىڭ 15 قاراشاسىندا جاسالعان. ال ءبىر ويىنشىقتىڭ باعاسى 7 مىڭنان 23 مىڭ تەڭگەگە دەيىن كورسەتىلگەن.

ويىنشىقتار جانە ولاردىڭ باعاسى

Kaemingk ماركاسىنداعى اق كەراميكالىق اتشا ويىنشىعى

مەكەمە بۇل ويىنشىقتىڭ ءار داناسىنا 9440 تەڭگە تولەمەك. جالپى شىعىن 944 مىڭ تەڭگەنى قۇرايدى.

ال ءدال وسىنداي تاۋار Kaspi دۇكەنىندە 1 290 تەڭگەدەن ساتىلىپ جاتىر.

ياعني، بيۋدجەت ەسەبىنەن الىناتىن ويىنشىقتىڭ باعاسى نارىقتاعىدان 7 ەسە قىمبات.

Kaemingk برەندىنە تيەسىلى “رەترو” شارلار

اكىمدىك ءبىر ورامىندا 2 داناسى بار ويىنشىققا 23.450 تەڭگە تولەمەك. بۇل تاۋارعا كەتەتىن جالپى شىعىن 1 ميلليون 641 500 تەڭگەنى قۇرايدى.

ماركەتپلەيستەردە ءبىر ورامىندا 6 داناسى بار وسىنداي ويىنشىق 2 800 تەڭگەدەن ساتىلىپ جاتىر. ايىرماشىلىق — 10 ەسە.

قار ورنەگى بار اشەكەيلى شار

بۇدان 160 دانا تاپسىرىس بەرىلگەن. ءارقايسى — 7 390 تەڭگە. جالپى شىعىن 1 182 400 تەڭگەنى قۇرايدى.

ءتۇيىن

ەلدە بيۋدجەت تاپشىلىعى ۋشىعىپ، وڭىرلەردە الەۋمەتتىك جوبالار مەن ينفراقۇرىلىمدىق جۇمىستارعا قارجى جەتپەي جاتقان كەزەڭدە، شاعىن اۋدان اكىمدىگىنىڭ ميلليونداعان تەڭگەنى جاڭا جىلدىق ويىنشىقتارعا جۇمساۋى قانشالىقتى قيسىندى؟