ماماندار الماتىدا جرۆي بويىنشا ەپيدەميولوگيالىق جاعداي تۇراقتى ەكەنىن مالىمدەدى، دەپ حابارلايدى Dalanews.kz.
الماتى قالاسى سانيتاريالىق-ەپيدەميولوگيالىق باقىلاۋ دەپارتامەنتى باسشىسىنىڭ ورىنباسارى اسەل قالىقوۆا قالادا ماۋسىمدىق جاعدايعا قاراماستان، سىرقاتتانۋ دەڭگەيى تۇراقتى ەكەنىن ايتتى.
دەپارتامەنت دەرەكتەرىنە سۇيەنسەك، 45-اپتادا الماتىدا 23 786 جرۆي جاعدايى تىركەلگەن، بۇل - 100 مىڭ تۇرعىنعا شاققاندا 1012،89. وتكەن جىلدىڭ وسى كەزەڭىمەن سالىستىرعاندا 18،7%-عا، ال الدىڭعى اپتامەن سالىستىرعاندا 18،9%-عا جوعارى. ناۋقاستاردىڭ 63%-دان استامى – بالالار.
"جاڭا ەپيدماۋسىم باستالعالى بارلىعى 113 390 جرۆي جاعدايى تىركەلدى. اۋرۋشاڭدىقتىڭ 58،6%-ى بالالار اراسىندا. بارلىعى - 2428 ناۋقاس، ونىڭ ىشىندە 255 جۇكتى ايەل جانە 1 جاسقا دەيىنگى 333 بالا اۋرۋحاناعا جاتقىزىلدى"، – دەدى اسەل قالىقوۆا.
الماتىدا تۇماۋدىڭ A/H3N2 شتامىنىڭ 13 راستالعان جاعدايى انىقتالعان، ولاردىڭ باسىم بولىگى – ەكپە الماعاندار. ناۋقاستاردىڭ كوپشىلىگى - جۇكتى ايەلدەر.
سونداي-اق، رينوۆيرۋس، پاراگريپپ جانە ماۋسىمدىق كوروناۆيرۋس بار ەكەنى تىركەلگەن.
مامان تۇرعىندارعا جرۆي مەن تۇماۋدىڭ الدىن الۋدىڭ نەگىزگى ءىس-شارالارىن ەسكە سالدى:
- يممۋنيتەتتى كوتەرۋ: س دارۋمەنىن قولدانۋ، دارىگەر نۇسقاۋىمەن وكسولين مايىن پايدالانۋ؛
- كوپشىلىك جينالاتىن ورىندارعا بارۋدى قىسقارتۋ، ءۇي-جايدى جەلدەتىپ، تازالاۋ، جرۆي-مەن اۋىراتىندارمەن قارىم-قاتىناستان اۋلاق بولۋ، قاجەت جاعدايدا ماسكا تاعۋ، جەكە گيگيەنا ەرەجەلەرىن ساقتاۋ؛
- سىرقاتتانعان جاعدايدا ۇيدە بولۋ، ءوزىن-وزى ەمدەمەۋ، مەديسينا قىزمەتكەرىن شاقىرۋ، جوتەلگەندە جانە قاقىرعاندا اۋىزدى قولمەن، سالفەتكامەن نەمەسە ورامالمەن جابۋ، قولدى ءجيى جۋۋ؛
- ناۋقاس بالالاردى مەكتەپكە، بالاباقشاعا جانە مادەني-بۇقارالىق ورىندارعا جىبەرمەۋ.
