اقتوبەدە مۇعالىمدەر ءوز-وزىن ورتەپ جىبەرەتىنىن ايتىپ، ۇندەۋ جاسادى، دەپ حابارلايدى Dalanews.kz.

ءمان-جايى

الەۋمەتتىك جەلىدە وقۋ-اعارتۋ مينيسترلىگىنىڭ جاڭا تارتىبىنەن كەيىن اقتوبەدەگى "ءبىلىم" جانە "سمارت ءبىلىم" جەكەمەنشىك مەكتەپتەرىنىڭ مۇعالىمدەرى قىركۇيەكتەن بەرى جالاقى الماعانى، ولار "اكىمدىك الدىندا وزدەرىن ورتەيمىز" دەگەن مالىمدەمە جاساعانى تۋرالى اقپارات تارادى.

شەنەۋنىكتەر جالاقىنى كەلەسى اپتا سوڭىنا دەيىن تولەۋگە ۋادە ەتكەن، ءبىراق ناقتى كەپىل جوق. ال شىعىندى وتەۋ ءۇشىن مۇعالىمدەرگە سوتقا جۇگىنۋ ۇسىنىلعان.

بۇعان دەيىنگى جاعداي

ەسكە سالايىق، جۋىردا دەپۋتات مۇرات ابەنوۆ جەكە مەنشىك مەكتەپتەرگە قاتىستى مالىمدەمە جاسادى. دەپۋتاتتىڭ سوزىنشە، جەكەمەنشىك مەكتەپتەردىڭ 57%-ى زامان تالابىنا ساي ەمەس. 

"شانتاج جاساۋدى قويىڭدار. مۇعالىمدەر ارقىلى ايقاي-شۋ شىعارىپ، جاسالماعان جۇمىستار ءۇشىن اقشانى ماجبۇرلەپ تولەتەمىز، ب ا ق پەن الەۋمەتتىك جەلى ارقىلى جاۋاپتى تۇلعالاردى قورقىتامىز دەپ ارەكەت جاساعاندار، وتپەن ويناماڭدار. جاڭا ءمينيستردىڭ ءتارتىپ ورناتامىن دەگەن بارلىق تالابىن تولىق قولدايمىز"، - دەدى ول.