اباي الاڭىندا, رەسپۋبليكا سارايىنىڭ الدىندا «قازاقستاننىڭ ٷزدٸك تاۋارى» رەسپۋبليكالىق بايقاۋىنىڭ ٶڭٸرلٸك كەزەڭٸ ٶتتٸ. ٸس-شاراعا الماتى ەكٸمٸ دارحان ساتىبالدى, «اتامەكەن» ۇلتتىق كەسٸپكەرلەر پالاتاسى پرەزيديۋمىنىڭ تٶراعاسى رايىمبەك باتالوۆ, سونداي-اق قالا كەسٸپكەرلەرٸ قاتىستى,- دەپ حابارلايدى Dalanews.kz
بۇل بايقاۋ 2006 جىلدان بەرٸ مەملەكەت باسشىسىنىڭ تاپسىرماسىمەن ٶتكٸزٸلٸپ كەلەدٸ. ماقساتى – وتاندىق ٶندٸرۋشٸلەردٸ قولداۋ, شاعىن جەنە ورتا بيزنەستٸ دامىتۋ, قازاقستاندىق ٶنٸمدٸ تۇتىنۋ مەدەنيەتٸن قالىپتاستىرۋ جەنە ٸشكٸ نارىقتى ساپالى, بەسەكەگە قابٸلەتتٸ تاۋارمەن قامتاماسىز ەتۋ.
الماتى ەكٸمٸ دارحان ساتىبالدى قاتىسۋشىلاردى قۇتتىقتاپ, بايقاۋدىڭ كەسٸپكەرلٸكتٸ قولداۋداعى ماڭىزىنا توقتالدى. ەكٸمنٸڭ ايتۋىنشا, ٶڭٸرلٸك كەزەڭنٸڭ جەڭٸمپازدارى ۋاقىت سىنىنان ٶتكەن ٶنٸم ساپاسىنىڭ مويىندالۋىنا قول جەتكٸزٸپ قانا قويماي, الماتىنى ۇلتتىق دەڭگەيدە تانىستىرۋ جاۋاپكەرشٸلٸگٸن دە ارقالايدى.
«قۇرمەتتٸ قاتىسۋشىلار مەن جەڭٸمپازدار! سٸزدەرمەن بٷگٸن وسىندا جٷزدەسكەنٸمە قۋانىشتىمىن. «قازاقستاننىڭ ٷزدٸك تاۋارى» بايقاۋى الماتىدا يگٸ دەستٷرگە اينالدى. جەڭٸس جاي عانا ماراپات ەمەس, بۇل ەڭ ەۋەلٸ سٸزدەردٸڭ ٶنٸمدەرٸڭٸزدٸڭ جوعارى ساپاسىنا بەرٸلگەن باعا. سٸزدەردٸڭ تاۋارلارىڭىزدى الماتىلىقتار عانا ەمەس, ەلٸمٸزدٸڭ سەرٸكتەستەرٸ دە تاڭدايدى. سٸزدەر ۇلتتىق كەزەڭدە قالامىزدى نامىسىن لايىقتى قورعايسىزدار دەپ سەنەمٸن. الماتى ەلدەگٸ كەسٸپكەرلٸك دامۋىنىڭ ناعىز ورتالىعى, ەرقايسىڭىز "قازاقستاندا جاسالعان" برەندٸنە ٷلەس قوسىپ وتىرسىزدار», – دەدٸ دارحان ساتىبالدى.
بايقاۋدىڭ جەڭٸمپازدارى:
🔹 ٶندٸرٸستٸك ماقساتتاعى ٷزدٸك تاۋارلار: «KazMedAspap» جشس, «QAZAQ TIGIN FABRIKASY» جشس, «IT&M» جشس
🔹 حالىق تۇتىناتىن ٷزدٸك تاۋارلار: «KSC-PLAST» جشس, «PAPIRONE» جشس, «Aigul Line» جشس
🔹 ٷزدٸك ازىق-تٷلٸك تاۋارلارى: «بيجان ەت ٶڭدەۋ زاۋىتى» جشس, «جيگالما» جشس, «GOJI» جشس
🔹 ارنايى نوميناتسييا «سالا كٶشباسشىسى – قالانىڭ سەرٸكتەسٸ»: «Mega بەتون پليۋس» جشس, «قازلەگپروم-الماتى» جشس, «استانا موتورس» كومپانييالار توبى, «MARCHALL» جشس, «اي-حانىم» جك (Qulpynai), «Le Porte M» جشس, «Xfinity Solutions» جشس, «قازاقستاندىق قۇبىر جٷيەلەرٸ» جشس, «TELLI ONDIRIS» جشس, «TEPLOSTIL» جشس, «BLS GROUP» جشس, «City Stone» جشس, «Lemonadoff Food» جشس, «KNG.PRO» جشس.
ٶڭٸرلٸك كەزەڭنٸڭ جەڭٸمپازدارى رەسپۋبليكالىق فينالدا باق سىناپ, «قازاقستاننىڭ ٷزدٸك تاۋارى» اتاعىنا ٷمٸتكەر اتانادى. ٸس-شارا بارىسىندا ٶنٸمدەر كٶرمەسٸ, كونتسەرتتٸك باعدارلاما مەن ماراپاتتاۋ رەسٸمٸ ٶتتٸ.
سونىمەن بٸرگە «بٸر اۋىل – بٸر ٶنٸم» جوباسى اياسىندا الماتىلىق ٶندٸرۋشٸلەردٸڭ جەرمەڭكەسٸ ۇيىمداستىرىلدى. وندا 40-قا جۋىق شاعىن جەنە ورتا بيزنەس ٶكٸلٸ مەن جەكە كەسٸپكەر ٶنٸمدەرٸن ۇسىندى. جەرمەڭكە قورىتىندى بويىنشا 10 ٷزدٸك ٶندٸرۋشٸ انىقتالىپ, ولار ٶڭٸرلٸك برەند كوميتەتٸنٸڭ ٸرٸكتەۋ كەزەڭٸنە جولداما الدى.
