اقش-تىڭ الماتىداعى باس كونسۋلدىعىنىڭ قۇرىلىسىن جۇرگىزۋگە كەلەتىن امەريكالىق ماماندارعا ءۇش جىلدىق ۆيزا بەرىلەدى. بۇل تۋرالى سەنات وتىرىسىندا ق ر سىرتقى ىستەر ءمينيسترىنىڭ ءبىرىنشى ورىنباسارى اقان راحمەتۋللين مالىمدەدى، دەپ حابارلايدى Dalanews.kz.
"باس كونسۋلدىقتىڭ قۇرىلىسىمەن اينالىساتىن امەريكالىق ماماندارعا ۆيزا ءۇش جىلعا بەرىلەدى جانە كەيىن ونىڭ مەرزىمىن ۇزارتۋ مۇمكىندىگى قاراستىرىلعان"، – دەدى راحمەتۋللين الماتىدا اقش كونسۋلدىعى سالىناتىن جەر تەلىمىن جالعا بەرۋ تۋرالى كەلىسىمگە قاتىستى دەپۋتاتتاردىڭ ساۋالدارىنا جاۋاپ بەرە وتىرىپ.
ونىڭ ايتۋىنشا، كەلىسىمگە سايكەس، اقش-تان كەلەتىن جۇمىسشىلار قازاقستاندا ەڭبەك ەتۋ ءۇشىن ءۇش جىلدىق ۆيزا الۋعا مىندەتتى. ەگەر ولار ەلىمىزدەگى ۆيزالىق تالاپتارعا سايكەس كەلمەسە، وندا قازاقستان زاڭناماسى اياسىندا شەشىم قابىلدانادى. قاجەت بولعان جاعدايدا، مۇنداي ۆيزا بەرۋدەن باس تارتۋعا دەيىنگى شارالار قولدانىلۋى مۇمكىن.
"الايدا مۇنداي جاعداي تۋىنداعان كۇننىڭ وزىندە، ماسەلە قازاقستان مەن اقش اراسىنداعى كونسۋلتاسيالار ارقىلى شەشىلەدى"، – دەپ تولىقتىردى راحمەتۋللين.
