الماتى وبلىسى قاراساي اۋدانىنا قاراستى جالپاقساي اۋىلىندا اۋىر جاعداي تىركەلدى. ءۇش بىردەي يت — ءبىر پيتبۋل جانە ەكى روتۆەيلەر جەكە اۋماقتان شىعىپ كەتىپ، فۋتبول الاڭىندا ويناپ جۇرگەن 10 جاستاعى بالاعا شابۋىل جاساعان. ءقازىر بالا اۋىر حالدە جانساقتاۋ بولىمىندە جاتىر، - دەپ حابارلايدى Dalanews.kz
كۋاگەرلەردىڭ ايتۋىنشا، يتتەر بالانى اياۋسىز جۇلمالاپ، قۇلاعىن جۇلىپ العان. سونىمەن قاتار، دەنەسى مەن باسىنان كوپتەگەن جاراقات العان. وقيعا ورنىندا بولعان ادامداردىڭ ايتۋىنشا، بۇل كورىنىس ادام شوشىرلىق بولعان: ادامدار ايقايلاپ، كومەك شاقىرعان، ءبىراق يتتەر توقتاماعان.
ەكى ەر ادام عانا بالانى قۇتقارۋعا كىرىسىپ، سولاردىڭ ءبىرى پيتبۋلگە قارسى قارۋ قولدانۋعا ءماجبۇر بولعان. اتىپ ولتىرىلگەن يتتەن كەيىن عانا جاعداي تۇراقتالعان.
تۇرعىنداردىڭ ايتۋىنشا، يتتەردىڭ يەسى جاۋاپكەرشىلىكتەن قاشىپ، كىناسىن مويىنداماي وتىر.
"ءتيىستى ساراپتامالار تاعايىندالدى، ولاردىڭ ناتيجەلەرى بويىنشا پروسەستىك شەشىم قابىلدانادى"، - دەدى الماتى وبلىسى پوليسيا دەپارتامەنتىندە.
جەرگىلىكتى تۇرعىندار بۇل جاعدايعا قاتتى الاڭداۋلى. ولار يتتەرگە قاتىستى زاڭداردىڭ كۇشەيتىلىپ، مۇنداي جاعدايلارعا جول بەرمەۋ ءۇشىن ناقتى شارالار قابىلدانۋىن تالاپ ەتۋدە.
