تالدىقورعاندا سوڭعى بىرنەشە جىلداعى ەڭ ءىرى نىسانداردىڭ ءبىرى – وليمپيادالىق تيپتەگى جابىق ءجۇزۋ باسسەينىنىڭ قۇرىلىسى اياقتالدى.
وسىنداي اۋقىمدى نىساننىڭ سالتاناتتى اشىلۋى استانا كۇنىندە ءوتتى. ءىس-شاراعا بوكستان وليمپيادا چەمپيونى ەرماحان يبرايموۆ، الماتى وبلىسىنىڭ اكىمى اماندىق باتالوۆ، جۇزۋدەن قازاقستان رەسپۋبليكاسىنىڭ بىرنەشە دۇركىن چەمپيونى ماريا فەدوتوۆا، كاسىبي كۇرەسكەر ارداق نازاروۆ، اۋىر اتلەت يليا يلين قاتىستى.
جەتىسۋ ولكەسىنىڭ سپورت قاۋىمداستىعى باسسەيننىڭ اشىلۋىن اسىعا كۇتتى. جوبا مەملەكەتتىك-جەكە مەنشىك سەرىكتەستىك اياسىندا جۇزەگە اسىرىلدى، ال ونىڭ ىسكە اسىرىلۋ بارىسىن وبلىس باسشىسى جەكە ءوزى قاداعالادى. ىرگەتاسىن قالاۋدان باستاپ، ىرگەلەس اۋماقتى اباتتاندىرۋعا دەيىنگى جۇمىستاردىڭ بارلىعى ايماق باسشىسىنىڭ نازارىنان تىس قالعان جوق.
"بۇگىنگى اشىلىپ وتىرعان زاماناۋي ءجۇزۋ باسسەينى – كوزدىڭ جاۋىن الادى. اتالعان عيمارات قالانىڭ تورىندە 3،8 گا جەرگە قاناتىن جايدى. بۇل عيماراتتىڭ جالپى اۋدانى – 13 مىڭ شارشى مەتردەن اسادى. ءجۇزۋ باسسەينىنىڭ قۇرىلىسىنا 11،4 ملرد. تەڭگەدەن استام قاراجات جۇمسالدى. مۇنداي اسەم دە، ادەمى، ءزاۋلىم سپورتتىق نىساننىڭ بوي كوتەرۋى – ەل ەكونوميكاسى دامۋىنىڭ ايقىن كورىنىسى"،– دەدى وبلىس اكىمى اماندىق باتالوۆ.
ايتا كەتەيىك، جەتىسۋداعى بۇكىل رەسپۋبليكا بويىنشا تەڭدەسى جوق جاڭا نىسان قالانىڭ وڭتۇستىك-باتىس تۇرعىن الابىندا ورنالاسقان. جابىق باسسەيننىڭ جالپى اۋدانى - 27 مىڭ شارشى مەتردى قۇرايدى. وندا الەمدىك ستاندارتتارعا سايكەس كەلەتىن 3 باسسەين بار. ولاردىڭ ءبىرى، ۇزىندىعى 50 مەتر، ءجۇزۋ، اكۆااەروبيكا، سۋ دوبى جانە سينحروندى ءجۇزۋ بويىنشا وقۋ-جاتتىعۋ ساباقتارىنا ارنالعان.
ال ەكىنشىسى-بيىكتىگى 5-تەن 10 مەترگە دەيىن سۋعا سەكىرۋ ءۇشىن. وندا رەسپۋبليكالىق جانە حالىقارالىق دەڭگەيدەگى جارىستار وتەدى، ولاردى امفيتەاتر تۇرىندەگى مىنبەلەردەن 500-دەن استام ادام باقىلاي الادى. ساراپشىلاردىڭ ايتۋىنشا، عيماراتتىڭ ساۋلەتى كورەرمەندەر ءجۇزۋشىنىڭ ءار قيمىلىن قاداعالاي الاتىنداي ەتىپ جوسپارلانعان.
جارىستان بوس ۋاقىتتا تالدىقورعان تۇرعىندارى مەن قوناقتارىنىڭ يگىلىگى ءۇشىن امبەباپ باسسەين جۇمىس ىستەيتىن بولادى. مۇندا ءجۇزۋدىڭ بارلىق تۇرلەرى ءۇشىن جاعداي جاسالعان. بالالار مەن الەۋمەتتىك از قامتىلعان تۇرعىندار ءۇشىن جەكەلەگەن جاعدايلار جاسالعان.
الداعى تاڭدا وبلىستىق دەنە شىنىقتىرۋ جانە سپورت باسقارماسىنىڭ حابارلاۋىنشا، ۆاتەرپولو مەن سينحروندى جۇزۋدەن قالالىق جانە وبلىستىق كوماندالار قۇرىلادى. وسىلايشا، سپورتتىڭ سۋ تۇرلەرى بويىنشا بولاشاق چەمپيونداردى تاربيەلەۋ جولىندا ءبىرشاما جۇمىستار اتقارىلادى. كۇنىنە باسسەين 750 ادامعا دەيىن قابىلداي الادى.
"جالپى، ءبىزدىڭ وبلىستا سپورتتى دامىتۋعا جانە سالاۋاتتى ءومىر سالتىن قالىپتاستىرۋعا، اسىرەسە جاس ۇرپاق اراسىندا ەرەكشە كوڭىل بولىنەتىنىن اتاپ وتكىم كەلەدى. ماسەلەن، وتكەن جىلدىڭ وزىندە جەتىسۋدا ونعا جۋىق سپورت نىسانى پايدالانۋعا بەرىلدى. جەتىسۋلىقتار ءۇشىن اسا ماڭىزدى نىساننىڭ بۇگىنگى اشىلۋى - تاريحي ءسات، تالدىقورعاننىڭ سۋ سپورتىنىڭ استاناسى بولۋ جولىنداعى العاشقى قادامدارىمىز. جەرلەستەرىمىز ءالى دە سۋ سپورتى تۇرلەرىنىڭ شىڭدارىن باعىندىراتىنىنا سەنەمىن"، – دەدى وبلىستىق دەنە شىنىقتىرۋ جانە سپورت باسقارماسىنىڭ باسشىسى نۇرباقىت تەڭىزبايەۆ.
باسسەيننىڭ اشىلۋىن قالا تۇرعىندارى دا اسىعا كۇتتى. قۇرىلىس الاڭىنان ءوتىپ بارا جاتىپ، ونىڭ اۋقىمدىلىعىنا نازار اۋدارماۋ مۇمكىن ەمەس. بۇل شىنىمەن دە كوپتەن كۇتكەن جانە قۋانىشتى ءسات. سوندىقتان دا، تالدىقورعاندىقتار بىرەگەي نىساننىڭ اشىلۋىنا وتباسىمەن كەلگەن.
- ەڭ الدىمەن نەمەرەلەرىمدى جۇزۋگە جازامىن. زاماناۋي باسسەين جاس سپورتشىلارعا ەرەكشە مۇمكىندىك بەرەدى. بالالار جوعارى دەڭگەيدە جاتتىعادى. سپورت عيماراتىنىڭ ءوزى تالدىقورعاننىڭ تاعى ءبىر بويتۇمارى بولادى دەپ ويلايمىن"،- دەيدى قالا تۇرعىنى ايمان تۇڭعىشباي قىزى.
