Taldyqorǵanda sońǵy birneshe jyldaǵy eń iri nysandardyń biri – olimpiadalyq tiptegi jabyq júzý basseininiń qurylysy aiaqtaldy.
Osyndai aýqymdy nysannyń saltanatty ashylýy Astana kúninde ótti. Is-sharaǵa bokstan Olimpiada chempiony Ermahan Ibraimov, Almaty oblysynyń ákimi Amandyq Batalov, júzýden Qazaqstan Respýblikasynyń birneshe dúrkin chempiony Mariia Fedotova, kásibi kúresker Ardaq Nazarov, aýyr atlet Ilia Ilin qatysty.
Jetisý ólkesiniń sport qaýymdastyǵy basseinniń ashylýyn asyǵa kútti. Joba memlekettik-jeke menshik seriktestik aiasynda júzege asyryldy, al onyń iske asyrylý barysyn oblys basshysy jeke ózi qadaǵalady. Irgetasyn qalaýdan bastap, irgeles aýmaqty abattandyrýǵa deiingi jumystardyń barlyǵy aimaq basshysynyń nazarynan tys qalǵan joq.
"Búgingi ashylyp otyrǵan zamanaýi júzý basseini – kózdiń jaýyn alady. Atalǵan ǵimarat qalanyń tórinde 3,8 ga jerge qanatyn jaidy. Bul ǵimarattyń jalpy aýdany – 13 myń sharshy metrden asady. Júzý basseininiń qurylysyna 11,4 mlrd. teńgeden astam qarajat jumsaldy. Mundai ásem de, ádemi, záýlim sporttyq nysannyń boi kóterýi – el ekonomikasy damýynyń aiqyn kórinisi",– dedi oblys ákimi Amandyq Batalov.
Aita keteiik, Jetisýdaǵy búkil respýblika boiynsha teńdesi joq jańa nysan qalanyń ońtústik-batys turǵyn alabynda ornalasqan. Jabyq basseinniń jalpy aýdany - 27 myń sharshy metrdi quraidy. Onda álemdik standarttarǵa sáikes keletin 3 bassein bar. Olardyń biri, uzyndyǵy 50 metr, júzý, akvaaerobika, sý doby jáne sinhrondy júzý boiynsha oqý-jattyǵý sabaqtaryna arnalǵan.
Al ekinshisi-biiktigi 5-ten 10 metrge deiin sýǵa sekirý úshin. Onda respýblikalyq jáne halyqaralyq deńgeidegi jarystar ótedi, olardy amfiteatr túrindegi minbelerden 500-den astam adam baqylai alady. Sarapshylardyń aitýynsha, ǵimarattyń sáýleti kórermender júzýshiniń ár qimylyn qadaǵalai alatyndai etip josparlanǵan.
Jarystan bos ýaqytta Taldyqorǵan turǵyndary men qonaqtarynyń igiligi úshin ámbebap bassein jumys isteitin bolady. Munda júzýdiń barlyq túrleri úshin jaǵdai jasalǵan. Balalar men áleýmettik az qamtylǵan turǵyndar úshin jekelegen jaǵdailar jasalǵan.
Aldaǵy tańda oblystyq dene shynyqtyrý jáne sport basqarmasynyń habarlaýynsha, vaterpolo men sinhrondy júzýden qalalyq jáne oblystyq komandalar qurylady. Osylaisha, sporttyń sý túrleri boiynsha bolashaq chempiondardy tárbieleý jolynda birshama jumystar atqarylady. Kúnine bassein 750 adamǵa deiin qabyldai alady.
"Jalpy, bizdiń oblysta sportty damytýǵa jáne salaýatty ómir saltyn qalyptastyrýǵa, ásirese jas urpaq arasynda erekshe kóńil bólinetinin atap ótkim keledi. Máselen, ótken jyldyń ózinde Jetisýda onǵa jýyq sport nysany paidalanýǵa berildi. Jetisýlyqtar úshin asa mańyzdy nysannyń búgingi ashylýy - tarihi sát, Taldyqorǵannyń sý sportynyń astanasy bolý jolyndaǵy Alǵashqy qadamdarymyz. Jerlesterimiz áli de sý sporty túrleriniń shyńdaryn baǵyndyratynyna senemin", – dedi oblystyq dene shynyqtyrý jáne sport basqarmasynyń basshysy Nurbaqyt Teńizbaev.
Basseinniń ashylýyn qala turǵyndary da asyǵa kútti. Qurylys alańynan ótip bara jatyp, onyń aýqymdylyǵyna nazar aýdarmaý múmkin emes. Bul shynymen de kópten kútken jáne qýanyshty sát. Sondyqtan da, taldyqorǵandyqtar biregei nysannyń ashylýyna otbasymen kelgen.
- Eń aldymen nemerelerimdi júzýge jazamyn. Zamanaýi bassein jas sportshylarǵa erekshe múmkindik beredi. Balalar joǵary deńgeide jattyǵady. Sport ǵimaratynyń ózi Taldyqorǵannyń taǵy bir boitumary bolady dep oilaimyn",- deidi qala turǵyny Aiman Tuńǵyshbaiqyzy.
