جىل باسىنان بەرى الماتى وبلىسىندا وڭدەۋ ونەركاسىبىنىڭ، اگرارلىق سالانىڭ، قۇرىلىس جۇمىستارىنىڭ كولەمى ارتقان. ماسەلەن، ونەركاسىپتىك ءوندىرىس 5%-كە، اۋىل شارۋاشىلىعى 2،4%، ال قۇرىلىس جۇمىستارى 6،5% ءوسىم كورسەتىپ وتىر، – دەپ حابارلايدى الماتى وبلىسى اكىمىنىڭ باسپا ءسوز قىزمەتى.

2020 جىلدىڭ قاڭتار – شىلدە ايلارىندا وبلىستا ەكونوميكانىڭ نەگىزگى سالالارىندا ءوسىم قامتاماسىز ەتىلگەن. الماتى وبلىستىق ەكونوميكا جانە بيۋدجەتتىك جوسپارلاۋ باسقارماسىنىڭ مالىمەتىنە قاراعاندا، وڭدەۋ ونەركاسىبىنىڭ، ونىڭ ىشىندە تاماق ونىمدەرىن، تەمەكى بۇيىمدارىن ءوندىرۋ، فارماسيەۆتيكا، ەلەكتر جابدىعىن ءوندىرۋدىڭ جوعارىلاۋى ەسەبىنەن (105،9%) ونەركاسىپتىك ءوندىرىس كولەمى 5%-كە ۇلعايىپ، 636،0 ملرد تەڭگەنى قۇرادى.

اۋىل شارۋاشىلىعىنداعى ءوسىم 2،4%، ياعني 264،2 ملرد تەڭگەگە جەتكەن، ەت جانە ءسۇت ءوندىرىسى ارتتى.

كارانتين كەزەڭىندە توقتاماي جۇمىس ىستەگەن سالانىڭ ءبىرى – قۇرىلىس. سونىڭ ناتيجەسىندە بۇل سالاداعى جۇمىستاردىڭ كولەمى 6،6%-كە ءوسىپ، 119،4 ملرد. تەڭگە بولدى. اتاپ ايتقاندا، 525 مىڭ شارشى مەتر تۇرعىن ءۇي ىسكە قوسىلعان. ەكونوميكا جانە بيۋدجەتتىك جوسپارلاۋ باسقارماسىنداعىلار وسى جىلى ينۆەستيسيا تارتۋ ءىسىنىڭ دە باسەڭدەمەگەنىن ايتادى. ولاردىڭ مالىمەتىنە سۇيەنسەك، جەتى اي ىشىندە وبلىسقا 292،5 ملرد. تەڭگە ينۆەستيسيا تارتىلىپ، ءوسىم 9،3%ء-تى قۇراعان.