بۇل تۋرالى وبلىس باسشىسى اماندىق باتالوۆ حالىق الدىندا ەسەپ بەرۋ كەزىندە مالىمدەدى.
دەمەۋشىلىك قاراجات ەسەبىنەن 2110 بىرلىك ۇيىمداستىرۋ تەحنيكاسى بەرىلىپ، ءبىر ملرد. تەڭگەگە 70 جاڭا جايلى اۆتوبۋس ساتىپ الىنعان. مەكتەپ اجەتحانالارىنىڭ ماسەلەسى دە ءوز شەشىمىن تاۋىپ كەلەدى. 348 وقۋ ورداسىندا بۇل جاعداي رەتتەلسە، كۇردەلى جوندەۋ جۇمىستارى جۇرگىزىلىپ 17 مەكتەپتىڭ اجەتحانالارىن جاساۋ قالعان.
ءبىلىم سالاسىنداعى تاعى ءبىر ماسەلە، ءۇش اۋىسىمدى وقۋ ورىندارىنىڭ سانىن قىسقارتۋ. ءۇش اۋىسىمدى وقىتۋدى جويۋ ءۇشىن ۇكىمەتتىڭ قولداۋىمەن سوڭعى بەس جىلدا 27 مىڭ ورىندىق 49 مەكتەپ سالىنعان.
كوشى-قون مەن بالا تۋۋ كورسەتكىشىنىڭ ارتۋىنا بايلانىستى ءۇش اۋىسىمدا وقىتاتىن مەتەپ سانى ارتۋدا. الماتى وبلىسىندا بۇگىنگى تاڭدا 49 ءبىلىم ورداسى 3 اۋىسىمدا بالالاردى وقىتادى.
«وتكەن جىلى بارلىعى 7 مەكتەپ پايدالانۋعا بەرىلدى، بيىل 18 مەكتەپ سالامىز. جۇمىسپەن قامتۋ 2021 جول كارتاسى اياسىندا تاعى جەتى مەكتەپتىڭ، ونىڭ ىشىندە ءۇش اۋىسىمنىڭ ورنىنا التى مەكتەپتىڭ قۇرىلىسى باستالادى. ەلباسىنىڭ بەس الەۋمەتتىك باستاماسىن ىسكە اسىرۋ اياسىندا تالدىقورعان قالاسىندا جەتىسۋ ۋنيۆەرسيتەتىنىڭ، مەديسينالىق جانە پوليتەحنيكالىق كوللەدجدەردىڭ، قاراتال اۋدانىندا باستوبە كوللەدجىنىڭ جاتاقحانالارى سالىندى»،- دەدى وبلىس اكىمى ەسەپ بەرۋ كەزىندە.
3 جاستان 6 جاسقا دەيىنگى بالالاردى مەكتەپكە دەيىنگى مەكەمەلەرمەن قامتۋ دەڭگەيى 98% - عا جەتتى. 127 بالاباقشانىڭ اشىلۋىمەن قامتۋ 2022 جىلى 100% - عا دەيىن جەتكىزىلەدى.
«وبلىس بويىنشا 193 بالاباقشانىڭ ىستىق سۋى جوق، 105 – ءى سۋمەن قامتاماسىز ەتىلمەگەن، 20 – سى كارىزسىز. پرەزيدەنت بالالاردى ەرتە جاستان دامىتۋ جۇيەسىن، مەكتەپكە دەيىنگى وقىتۋدىڭ بالامالى نىساندارىن قۇرۋدى جانە باسقا دا ماسەلەلەردى قامتيتىن كەشەندى جوسپار ازىرلەۋدى تاپسىردى. سوندىقتان وسى پروبلەمالاردى شەشۋ جونىندەگى وبلىستىق جوسپاردى مۇقيات زەردەلەپ، ازىرلەۋ قاجەت»،- دەپ تۇيىندەدى ايماق باسشىسى اماندىق عابباس ۇلى. .
