قاراشانى قايران قالدىراتىن وسى «ءبىر جولداردىڭ تاقتايداي تەگىس بولۋىنا نە كەدەرگى؟» دەگەن ساۋالدىڭ جاۋابى تابىلعان سىڭايلى. جيىن بارىسىندا جول قۇرلىس ماتەريالدارىنىڭ ارنايى سىنامادان وتپەگەندىگى، ياكي تالاپقا ساي بولماعاندىعى تىلگە تيەك ەتىلدى.
بۇل تۋرالى «جول اكتيۆتەرىنىڭ ۇلتتىق ساپا ورتالىعى» رمك (رەسپۋبليكالىق مەملەكەتتىك كاسىپورىن) الماتى وبلىستىق فيليالىنىڭ ديرەكتورى جاسۇلان كەرىمقۇلوۆ مالىمدەدى.
تەمىر تۇلپار جۇيىتكەي جونەلەتىن تراسسانىڭ كەم-كەتىگىن باقىلايتىن مەكەمە- «جول اكتيۆتەرى ۇلتتىق ساپا ورتالىعى» رەسپۋبليكالىق مەملەكەتتىك كاسىپورنى بولىپ تابىلادى.
اتالمىش مەكەمەنىڭ الماتى وبلىستىق فيليالىنداعى ماماندار ەلىمىزدەگى كارانتينگە، ءتىپتى دەمالىس كۇندەرىنە قاراماستان تەكسەرۋ جۇمىستارىن جۇرگىزۋدە. ولار جول قۇرىلىسى قىزۋ ءجۇرىپ جاتقان ايماقتارعا بارىپ، جىلجىمالى جول زەرتحاناسىندا ورناتىلعان دياگنوستيكا جاسايتىن باعدارلاما ارقىلى جانە زاماناۋي قۇرالدارمەن ارنايى تەكسەرۋ جۇرگىزىپ، ءىستى باقىلاۋىندا ۇستاۋدا.
اعىمداعى جىلدىڭ قاڭتار ايىننىڭ 1-نەن جەلتوقساننىڭ 2ء-شى جۇلدىزى ارالىعىندا 1199 جولعا تەكسەرىس جۇرگىزىلگەن. ال، ءىشىنارا تەكسەرۋدىڭ سانى 2075ء-ى قۇراپ وتىر. سونىڭ ىشىندە 570 جول قۇرىلىس ماتەريالدارىنىڭ سىنامالارى نورماتيۆتىك قۇجاتتاردىڭ تالاپتارىنا ساي بولماي شىققان. 1292 تەحنولوگيالىق اقاۋلار تابىلىپ، ونىڭ 706 بۇگىنگى كۇنگە دەيىن جويىلماعان.
الماتى وبلىسى بويىنشا جولعا قويىلعان «ادالدىق الاڭى» جوباسى اياسىندا 11 رەت جول جۇمىستارىنىڭ ساپاسىن تەكسەرۋ جۇرگىزىلىپ، 31 سىناما الىنعان. ونىڭ 22ء-ى تالاپقا ساي بولماي شىعىپتى. سونىمەن قاتار تەكسەرۋ بارىسىندا 28 اقاۋلار انىقتالىندى. تابىلعان سايكەسسىزدىكتەر بويىنشا 5 حات جولدانعان. 403 شاقىرىم جولدارعا جىلجىمالى زەرتحانانىڭ كومەگىمەن ساراپتاما جۇرگىزىلگەن ەكەن.
سونىڭ ناتيجەسىندە ءبىراز ولقىلىقتار مەن كەمشىلىكتەر دەر كەزىندە انىقتالىپ، تاپسىرىس بەرۋشىلەر مەن مەردىگەرلەرگە حات جولدانىپ، تالاپقا ساي كەلمەگەن ايماق قايتا قالپىنا كەلتىرىلۋدە. ەستەرىڭىزگە سالامىز، جالپى الماتى وبلىسى بويىنشا – 3065،5 شاقىرىم جولعا تەكسەرىس جۇرگىزىلدى.
