Almaty oblysynda 3065,5 shaqyrym joldyń jaǵdaiy tekserildi
Qarashany qairan qaldyratyn osy «bir joldardyń taqtaidai tegis bolýyna ne kedergi?» degen saýaldyń jaýaby tabylǵan syńaily. Jiyn barysynda jol qurlys materialdarynyń arnaiy synamadan ótpegendigi, iaki talapqa sai bolmaǵandyǵy tilge tiek etildi.
Bul týraly «Jol aktivteriniń ulttyq sapa ortalyǵy» RMK (respýblikalyq memlekettik kásiporyn) Almaty oblystyq filialynyń direktory Jasulan Kerimqulov málimdedi.
Temir tulpar júiitkei jóneletin trassanyń kem-ketigin baqylaityn mekeme- «Jol aktivteri ulttyq sapa ortalyǵy» respýblikalyq memlekettik kásiporny bolyp tabylady.
Atalmysh mekemeniń Almaty oblystyq filialyndaǵy mamandar elimizdegi karantinge, tipti demalys kúnderine qaramastan tekserý jumystaryn júrgizýde. Olar jol qurylysy qyzý júrip jatqan aimaqtarǵa baryp, jyljymaly jol zerthanasynda ornatylǵan diagnostika jasaityn baǵdarlama arqyly jáne zamanaýi quraldarmen arnaiy tekserý júrgizip, isti baqylaýynda ustaýda.
Aǵymdaǵy jyldyń qańtar aiynnyń 1-nen jeltoqsannyń 2-shi juldyzy aralyǵynda 1199 jolǵa tekseris júrgizilgen. Al, ishinara tekserýdiń sany 2075-i qurap otyr. Sonyń ishinde 570 jol qurylys materialdarynyń synamalary normativtik qujattardyń talaptaryna sai bolmai shyqqan. 1292 tehnologiialyq aqaýlar tabylyp, onyń 706 búgingi kúnge deiin joiylmaǵan.
Almaty oblysy boiynsha jolǵa qoiylǵan «Adaldyq alańy» jobasy aiasynda 11 ret jol jumystarynyń sapasyn tekserý júrgizilip, 31 synama alynǵan. Onyń 22-i talapqa sai bolmai shyǵypty. Sonymen qatar tekserý barysynda 28 aqaýlar anyqtalyndy. Tabylǵan sáikessizdikter boiynsha 5 hat joldanǵan. 403 shaqyrym joldarǵa jyljymaly zerthananyń kómegimen saraptama júrgizilgen eken.
Sonyń nátijesinde biraz olqylyqtar men kemshilikter der kezinde anyqtalyp, tapsyrys berýshiler men merdigerlerge hat joldanyp, talapqa sai kelmegen aimaq qaita qalpyna keltirilýde. Esterińizge salamyz, jalpy Almaty oblysy boiynsha – 3065,5 shaqyrym jolǵa tekseris júrgizildi.
