جەتىسۋ وبلىسىندا الاكولدە ءجۇزۋ قۇرالدارىنىڭ باقىلاۋسىز قوزعالىسى ماسەلەسى شەشىلدى. وسى ماسەلەنى رەتتەۋ ءۇشىن جالپى سۋ پايدالانۋ قاعيدالارى بەكىتىلدى، وندا ءتيىستى تۇسىنىكتەمەلەر بەرىلىپ، سۋ ايدىنىنداعى قاۋىپسىزدىك قاعيدالارىنىڭ تالاپتارىن ساقتاماعاندارعا جاۋاپكەرشىلىك بەلگىلەنەتىنى اتاپ كورسەتىلگەن. كولىكتىك باقىلاۋ ينسپەكتورلارىنىڭ سانى جانە تيىسىنشە شاعىن كولەمدى سۋ قۇرالدارىنىڭ قاتارى دا ارتپاق. سونىمەن قاتار جازعى شومىلۋ ماۋسىمى بارىسىندا كول جاعالاۋىنىڭ سانيتارلىق جاعدايىنا ەرەكشە نازار اۋدارىلاتىن بولادى،- دەپ حابارلايدى Dalanews.kz
وڭىردەگى تۋريزم سالاسىن دامىتۋدىڭ وسى جانە باسقا دا وزەكتى ماسەلەلەرى وبلىس اكىمىنىڭ ورىنباسارى اسەت قاناعاتوۆتىڭ توراعالىعىمەن وتكەن كەڭەيتىلگەن كەڭەستە تالقىلاندى. جيىنعا ءبىرقاتار باسقارمالاردىڭ، پوليسيا، توتەنشە جاعداي دەپارتامەنتتەرىنىڭ باسشىلارى، اۋدان-قالا اكىمدەرى ونلاين بايلانىسقا قوسىلدى. اتاپ ايتقاندا، الاكول جانە بالقاش كولدەرىندەگى تۋريستىك شومىلۋ ماۋسىمىنا دايىندىق، دەمالۋشىلاردىڭ قاۋىپسىزدىگىن، تۋريزم وبەكتىلەرىنە كولىكپەن بارۋدىڭ قولجەتىمدىلىگىن جانە ءبىرقاتار ماڭىزدى ينفراقۇرىلىمدىق جوبالاردىڭ ىسكە اسىرىلۋ بارىسىن قامتاماسىز ەتۋگە باسا نازار اۋدارىلدى.
ءا. قاناعاتوۆتىڭ ايتۋىنشا، وتكەن جىلدىڭ قورىتىندىسى بويىنشا وڭىردە قابىلدانعان شارالاردىڭ ارقاسىندا جەتىسۋ وبلىسىنا 2 ملن. تۋريست كەلگەن، بۇل 2023 جىلمەن سالىستىرعاندا 11،1%-عا ارتىق. بۇل رەتتە شەتەلدىك تۋريستەر سانى 63،6%-عا ءوستى.
- تۋريزم سالاسىن دامىتۋ مەملەكەت باسشىسىنىڭ ەرەكشە باقىلاۋىندا. جەتىسۋ وبلىسىنىڭ ەكونوميكاسى ءۇشىن ماڭىزدى سانالاتىن سالانى دامىتۋ 5 باستى باعىتقا نەگىزدەلگەن. ولار - الاكول جانە بالقاش كولدەرى، «التىنەمەل»، «جوڭعار الاتاۋى» ۇلتتىق تابيعي پاركتەرى، جەتىسۋ الاتاۋىنىڭ تاۋ جوتالارى. قىزمەت كورسەتۋ ساپاسىن جاقسارتۋ جانە تۋريستەر ءۇشىن قولايلى جاعداي جاساۋ ءۇشىن جول جانە ينجەنەرلىك ينفراقۇرىلىم سالۋ باعىتىندا ءبىرقاتار شارالار قابىلدانىپ جاتىر، - دەگەن وبلىس اكىمىنىڭ ورىنباسارى وڭىردە تۋريزم وبەكتىلەرىنە كولىكپەن جەتۋ مۇمكىندىكتەرىن دامىتۋ جۇمىستارىنا ەگجەي-تەگجەيلى توقتالدى.
اتاپ ايتقاندا، تالدىقورعان قالاسىنان الاكول جاعالاۋىنا دەيىنگى جولدى جانە «ءۇشارال – دوستىق» جولىن قالپىنا كەلتىرۋ جۇمىستارى تولىعىمەن اياقتالدى. ءۇشارال قالاسىنداعى اۋەجايدىڭ ۇشۋ-قونۋ جولاعى قايتا جاڭارتىلدى. الاكول باعىتىنا استانا، الماتى، وسكەمەن، سەمەي، قىزىلوردا قالالارىنان 12 پويىز قاتىنايدى. لەپسى-بالقاش اۆتوموبيل جولىنىڭ جوندەۋ جۇمىستارى جانە باسقا دا ءبىرقاتار ينفراقۇرىلىمدىق جوبالار اياقتالدى. ش. ءۋاليحانوۆ مۇراجاي كەشەنىنە رەكونسترۋكسيا جۇرگىزىلىپ، وبەكتىگە دەيىنگى جول جوندەلدى. سونداي-اق ۇزىندىعى 20 كم «توپوليەۆكا – جالاڭاش كوردونى» جولىنا ورتاشا جوندەۋ جۇمىستارى جۇرگىزىلدى. سونىمەن قاتار رەسپۋبليكالىق بيۋدجەتتەن جەتىسۋ ولكەسىنىڭ تاعى ءبىر ءىنجۋ-مارجانى – بۇرقانبۇلاق سارقىراماسىنا دەيىن جول سالۋعا قاراجات ءبولىندى.
وڭىردە ءتۋريزمدى دامىتۋ باعىتىندا اتقارىلعان جۇمىستار مەن الداعى جوسپارلار تۋرالى بايانداعان وبلىستىق كاسىپكەرلىك جانە يندۋستريالىق-يننوۆاسيالىق دامۋ باسقارماسى باسشىسىنىڭ ورىنباسارى دانيار ىسقاقوۆ 2024 جىلى جەتىسۋ وبلىسىندا دەمالىس ورىندارىنداعى توسەك-ورىن سانى 21،9 مىڭدى قۇراعانىن، بۇل 2023 جىلمەن سالىستىرعاندا 35،1%-عا وسكەنىن ايتتى. اقىلى تۋريستىك-ساۋىقتىرۋ قىزمەتتەرىنىڭ كولەمى 60،8%-عا، ال بيۋدجەتكە سالىق تۇسىمدەرى 58،7%-عا ءوستى. بۇل رەتتە الاكول اۋدانىندا ورنالاستىرۋ ورىندارىنىڭ سانى 270-كە جەتتى.
ءوز كەزەگىندە الاكول اۋدانىنىڭ اكىمى الماس ابدينوۆ تۋريستىك ماۋسىم باستالعانعا دەيىن كول جاعالاۋىنىڭ قاۋىپسىزدىگى مەن سانيتارلىق جاعدايىنا ەرەكشە نازار اۋدارىلعانىن حابارلادى. وسى ماقساتتا قوسىمشا 90 قوقىس جاشىگى ورناتىلادى، ءسويتىپ ولاردىڭ سانى 220-عا جەتەدى. تەحنيكا قاجەتتىلىگى ماسەلەسى دە شەشىلدى، ال قوقىستى شىعارۋمەن جەرگىلىكتى كومپانيا اينالىسادى. سانيتارلىق-گيگيەنالىق توراپتاردىڭ سانى دا ارتىپ، 53 بىرلىككە جەتپەك.
سونىمەن قاتار ەلەكترمەن ۇزدىكسىز جابدىقتاۋدى قامتاماسىز ەتۋ ءۇشىن جاڭا «اقشي» قوسالقى ستانسياسىنىڭ قۇرىلىسى جۇرگىزىلۋدە، بەسكولدەن اقشيگە دەيىن جوعارى ۆولتتى ەلەكتر بەرۋ جەلىلەرىنىڭ قۇرىلىسى 80%-عا اياقتالدى. بۇدان بولەك، كەلەسى جىلعا اۋىسپالى نىسان – اقشيدەگى كارىز-تازارتۋ قۇرىلىستارىن سالۋ جۇمىستارى باستالدى. جاعالاۋدى نىعايتۋ، سونداي-اق جاعالاۋداعى ۇيالى بايلانىس پەن ينتەرنەتتى ۇزدىكسىز قامتاماسىز ەتۋ ماسەلەسى دە نازاردان تىس قالعان جوق.
ا. قاناعاتوۆ ءوز كەزەگىندە وبلىس اكىمىنىڭ تاپسىرماسى بويىنشا ءجۇزۋ قۇرالدارىنىڭ باقىلاۋسىز قوزعالىسى ماسەلەسىن رەتتەۋ ءۇشىن وبلىستىق ءماسليحاتتىڭ سەسسياسىندا جالپى سۋ پايدالانۋ ەرەجەسى بەكىتىلگەنىن، وندا ءتيىستى تۇسىنىكتەمەلەر بەرىلىپ، سۋ ايدىندارىنداعى قاۋىپسىزدىك ەرەجەلەرىنىڭ تالاپتارىن ساقتاماعاندارعا جاۋاپكەرشىلىك بەلگىلەنگەنىن ايتتى. سونىمەن قاتار شومىلۋ ماۋسىمىنا قاراي كولىكتىك باقىلاۋ ينسپەكتورلارىنىڭ سانى جانە شاعىن كولەمدى سۋ قۇرالدارىنىڭ قاتارى ۇلعايتىلادى.
بالقاش كولىنىڭ جاعالاۋىنداعى ءتۋريزمدى دامىتۋ تۋرالى ايتساق، قازىرگى كەزدە «بالقاش» تۋريستىك-رەكرەاسيالىق دەمالىس ايماعىنىڭ ينجەنەرلىك-كوممۋنيكاسيالىق جەلىسىن سالۋ جوباسى ىسكە اسىرىلۋدا. سونداي-اق ماۋسىم ايىنىڭ سوڭىنا دەيىن كولدىڭ جاعالاۋ ايماعىن ەگجەي-تەگجەيلى جوسپارلاۋ جوباسى بويىنشا مەملەكەتتىك ساراپتاما قورىتىندىسى دايىن بولادى دەپ كۇتىلۋدە.
قوعامدىق ءتارتىپتى قامتاماسىز ەتۋ، جول قوزعالىسى قاۋىپسىزدىگى، توتەنشە جاعدايلاردىڭ الدىن الۋ ماسەلەلەرى بويىنشا وبلىستىق پوليسيا دەپارتامەنتى مەن تجد وكىلدەرى باياندادى. كۋرورتتىق ايماقتاردا، تۋريستەر كوپ جينالاتىن ورىنداردا مەديسينالىق قىزمەت كورسەتۋ ماسەلەسى ەرەكشە باقىلاۋدا.
بۇل رەتتە پانفيلوۆ اۋدانى، ونىڭ ىشىندە «قورعاس» شەكارا ماڭى ىنتىماقتاستىعى حالىقارالىق ورتالىعى – وڭىردەگى تاعى ءبىر ماڭىزدى تۋريستىك باعىت. جازعى دەمالىستىڭ باستالۋىنا وراي ورتالىققا كەلۋشىلەر سانى ەسەلەپ ارتىپ، ولارعا ساپالى قىزمەت كورسەتۋ جانە قاۋىپسىزدىگىن قامتاماسىز ەتۋ ءۇشىن ءتيىستى شارالار قابىلدانۋدا.
كەزدەسۋ سوڭىندا جاۋاپتى تۇلعالارعا تۋريزم وبەكتىلەرىنىڭ كولىكتىك قولجەتىمدىلىگىن قامتاماسىز ەتۋگە جانە ينفراقۇرىلىمدىق جوبالاردى ىسكە اسىرۋدىڭ مەرزىمدەرىن ساقتاۋ مەن ساپاسىنا ەرەكشە نازار اۋدارۋعا، سونداي-اق تۋريستىك وبەكتىلەردىڭ تۋريستەردى قابىلداۋعا، جالپى شومىلۋ ماۋسىمىن وتكىزۋگە دايىندىعىنا قاتىستى تاپسىرمالار بەرىلدى.
سونىمەن قاتار ءوڭىردىڭ تۋريستىك سالاسىنا ينۆەستيسيا تارتۋعا ەرەكشە كوڭىل ءبولۋ قاجەت.
اتاپ وتسەك، جالپى ءقاڭتار-ساۋىر ايلارىندا وبلىس ەكونوميكاسىنا 1،6 ەسە وسىممەن 97 ملرد. تەڭگەدەن استام ينۆەستيسيا تارتىلعان، ونىڭ ىشىندە جەكە ينۆەستيسيالار – 73،6 ملرد.تەڭگە.
