فورۋمعا وڭىرلىك سىبايلاس جەمقورلىققا قارسى قىزمەت باسشىسىنىڭ ءبىرىنشى ورىنباسارى تالعات باشيەۆ، وبلىستىق قوعامدىق كەڭەستىڭ ءتوراعاسى دەنيس رىپاكوۆ، جوو رەكتورلارى، قوعامدىق ۇيىمداردىڭ بەلسەندىلەرى، ب ا ق وكىلدەرى مەن جاستار قاتىستى.
شاراعا قاتىسۋشىلاردى حالىقارالىق سىبايلاس جەمقورلىققا قارسى كۇرەس كۇنىمەن وبلىس اكىمىنىڭ اتىنان وبلىستىق ءماسليحاتتىڭ حاتشىسى، وبلىستىق قوعامدىق كەڭەستىڭ ءتوراعاسى دەنيس رىپاكوۆ قۇتتىقتادى.
– ءبىز، جۇرتشىلىق جانە وبلىستىڭ دەپۋتاتتىق كورپۋسى، الداعى ۋاقىتتا دا سىبايلاس جەمقورلىقتىڭ كەز كەلگەن كورىنىستەرىنە قارسى تۇرۋعا جانە بىرلەسە قىزمەت اتقارۋعا دايىنبىز، – دەدى دەنيس رىپاكوۆ.
ەلىمىزدىڭ سىبايلاس جەمقورلىققا قارسى ساياساتى ۇلتتىق تاجىريبە مەن وزىق شەتەلدىك تاجىريبەنى ەسكەرە وتىرىپ، قوعامنىڭ سۇرانىستارى نەگىزىندە ۇنەمى جەتىلدىرىلىپ كەلەدى. پرەزيدەنتتىڭ جارلىعىمەن 2022 جىلعى 2 اقپاندا بەكىتىلگەن سىبايلاس جەمقورلىققا قارسى ساياسات تۇجىرىمداماسىنا سايكەس سىبايلاس جەمقورلىققا قارسى كۇرەسكە ازاماتتىق قوعام بەلسەندى تۇردە قاتىستىرىلىپ، كەشەندى شارالار جۇزەگە اسىرىلۋدا.
2022 جىلى سىبايلاس جەمقورلىق تاۋەكەلدەرىن انىقتاۋ جانە قۇقىق بۇزۋشىلىقتاردىڭ الدىن الۋ ماقساتىندا اگەنتتىك سىبايلاس جەمقورلىق تاۋەكەلدەرىنىڭ كارتاسىن ازىرلەدى. وندا اشىقتىقتىڭ جوقتىعى جانە اكىمشىلىك كەدەرگىلەردىڭ، زاڭنامانىڭ جەتىلمەگەندىگىنىڭ كەسىرىنەن وڭىردە شەشىم تابا الماي كەلە جاتقان وزەكتى ماسەلەلەر كورسەتىلگەن.
– اتالعان پروبلەمالاردى شەشۋدە جەرگىلىكتى اتقارۋشى ورگانداردىڭ، سونداي-اق قوعام وكىلدەرىنىڭ ءوز رەسۋرستارى مەن مۇمكىندىكتەرىن بىرىكتىرۋى وتە ماڭىزدى. ءوز كەزەگىندە، سىبايلاس جەمقورلىققا قارسى قىزمەت قالايدا قىلمىستىق ءىس قوزعاۋدى وزىنە ماقسات ەتپەيدى، ەڭ باستىسى – بيۋدجەت ەسەبىنەن سالىنىپ جاتقان وبەكتىلەر ساپالى تۇرعىزىلىپ، بەلگىلەنگەن مەرزىمدە تاپسىرىلسا، ادامدار ۋاقىتىندا اۋىزسۋمەن قامتاماسىز ەتىلسە، ساپالى جولمەن جۇرسە، جاڭا پاتەرلەرگە كىرسە، سول ماڭىزدى، – دەپ اتاپ ءوتتى وبلىستىڭ سىبايلاس جەمقورلىققا قارسى ۆەدومستۆو باسشىسىنىڭ ءبىرىنشى ورىنباسارى تالعات باشيەۆ.
فورۋمدا سىبايلاس جەمقورلىققا قارسى تاقىرىپتارعا جاريالانعان ءتۇرلى كونكۋرستاردىڭ جەڭىمپازدارى ماراپاتتالدى. ولاردىڭ قاتارىندا ستۋدەنتتەر مەن وقۋشىلار اراسىندا سىبايلاس جەمقورلىققا قارسى ۇزدىك جوبا مەن بەينەروليككە ارنالعان «پاراساتتى وتباسى» بايقاۋى بار.
ۆەدومستۆو وكىلدەرىنىڭ ايتۋىنشا، «پاراساتتى وتباسى» بايقاۋى ءتورتىنشى جىل قاتارىنان وتكىزىلىپ كەلەدى. بايقاۋ وتباسىلىق قۇندىلىقتار پريزماسى ارقىلى پاراساتتىلىق قاعيداتتارىن ناسيحاتتاۋعا باعىتتالعان.
كونكۋرستىڭ وبلىس تۇرعىندارى اراسىندا وڭ پىكىرگە يە بولىپ، كەڭ قولداۋ تاپقانى بايقالادى. بيىل بايقاۋعا قاتىسقانداردىڭ قاراسى بۇرىنعى جىلدارمەن سالىستىرعاندا الدەقايدا كوپ بولىپتى.
– مەنىڭ نەمەرەم شەرحان – قالجىر ورتا مەكتەبىنىڭ 7-سىنىپ وقۋشىسى، ول «پاراساتتى وتباسى» بايقاۋىندا ءۇشىنشى ورىنعا يە بولدى. ول سىبايلاس جەمقورلىققا قارسى تاقىرىپتا ءۇش مينۋتتىق روليك ءتۇسىرىپ، بايقاۋعا جىبەردى. ونىڭ جۇمىسىن باعالاپ، اتاپ وتكەنىنە وتە قۋانىشتىمىن. مۇنداي ءىس-شارالار اۋاداي قاجەت. وتان دەگەن وتباسىنان باستالادى. بالالار جاستايىنان سىبايلاس جەمقورلىقتىڭ زياندىلىعىن ءبىلۋى كەرەك، – دەيدى كۇرشىم اۋدانىنىڭ تۇرعىنى باعداگۇل مۇقاشيەۆا.
شەرحان ءوز سيۋجەتىندە قۇربىلارىنىڭ ءاميانىن ءتۇسىرىپ العان اپايعا زاتىن قايتارىپ بەرگەنىن كورسەتىپتى.
– بالالار كىشكەنتايىنان ادال بولۋى كەرەك، – دەيدى شەرحان مۇقاشيەۆ.
وسى بايقاۋدا «قامقورشى وتباسى» نوميناسياسى بويىنشا ماراپاتتالعان ايانا راحمان – بولعانبايەۆ اتىنداعى سامار مەكتەپ-ليسەيىنىڭ ءتورتىنشى سىنىپ وقۋشىسى. ول ماراپاتتاۋعا مۇعالىمىمەن كەلىپتى. اناسى ءدال سول كۇنى التىنشى سابيىمەن پەرزەنتحانادان شىققان ەكەن. ايانا بەينەروليكتە كىشكەنتاي باۋىرلارى، وتباسىنىڭ تاربيەسى جايىندا بايانداپتى.
سىبايلاس جەمقورلىقپەن كۇرەستە اسىرەسە جاستاردىڭ ءرولى ماڭىزدى. سارسەن امانجولوۆ اتىنداعى شىعىس قازاقستان ۋنيۆەرسيتەتىندە «سىبايلاس جەمقورلىقسىز ءادىل قوعام قۇرايىق!» اتتى ستۋدەنتتەردىڭ فورۋمى ءوتتى. فورۋمعا وبلىستىق سىبايلاس جەمقورلىققا قارسى قىزمەتتىڭ پريەۆەنسيا باسقارماسىنىڭ باسشىسى ارحات بەيسەمبايەۆ، جوعارى وقۋ ورنىنىڭ پرورەكتورلارى مەن وقىتۋشىلارى، ستۋدەنتتەرى قاتىستى.
فورۋم ۋنيۆەرسيتەت ستۋدەنتتەرىنىڭ سىبايلاس جەمقورلىققا قارسى يدەيالارى، جوبالارى مەن تاجىريبەلەرى تۋرالى ءوزارا پىكىر الماسۋ، سول ارقىلى سىبايلاس جەمقورلىقتىڭ كەز كەلگەن كورىنىستەرىنە توزبەۋشىلىكتى قالىپتاستىرۋ ماقساتىندا وتكىزىلدى.
