ەبدٸراحمانوۆ نە دەيدٸ?
“بٸزدە ٷش-تٶرت ازاماتتىڭ ناقتى اتى-جٶنٸ, تۇرىپ جاتقان مەكەنجايلارى بار. وسى ازاماتتاردىڭ مەسەلەسٸن ولاردىڭ الدىندا قويىپ جاتىرمىز. ولاردان بٸزگە مەلٸمەت تٷسٸپ جاتىر”, — دەدٸ مينيستر جۋرناليستەرگە.
مينيستر بۇل مەسەلەنٸڭ ٶتە كٷردەلٸ ەكەنٸن اتاپ ٶتتٸ.
“كٷندەلٸكتٸ اينالىسامىز. بۇل مەسەلە بويىنشا قىتايدىڭ سىرتقى ٸستەر مينيسترلٸگٸمەن ديالوگ جٷرگٸزٸلۋدە. قۇرىلتايدان كەيٸن بٸزگە بٸرنەشە ٶتٸنٸش كەلٸپ تٷسكەن, بٸز ونى ەگجەي-تەگجەيلٸ قاراستىرىپ جاتىرمىز. ول مەسەلەلەردٸڭ بەرٸن قىتاي تاراپىنىڭ الدىنا قويامىز, ونىڭ ٸشٸندە قازاقستاندا اككرەديتاتسييادان ٶتكەن قىتايدىڭ ەلشٸلٸگٸ بار, الماتىدا باس كونسۋلدىعى بار. تٶتەنشە جەنە ٶكٸلەتتٸ ەلشٸسٸ دە وسى مەسەلەمەن اينالىسادى, ول كٸسٸنٸڭ الدىنا دا قويعانبىز. حالىقارالىق كونفەرەنتسييا كەزٸندە ٶزدەرٸڭٸز دە ول كٸسٸگە سۇراق قويۋعا مٷمكٸندٸكتەرٸڭٸز بولدى”, — دەدٸ ەبدٸراحمانوۆ.
مينيستر بۇل ٶزگە ەلدٸڭ ٸشكٸ مەسەلەسٸ ەكەنٸن, سوندىقتان ارالاسۋعا مٷمكٸندٸك جوق ەكەنٸن ايتتى. بٸراق ديپلوماتييالىق كەلٸسسٶزدەر جٷرگٸزٸلە بەرەدٸ.
“ەلگە قايتىپ كەلگەن وتانداستارىمىزدىڭ قىتايدان كەلٸپ جاتقان تۋىستارى بار. ولار ەلٸ قىتاي ازاماتتارى, قازاق ازاماتتىعىنا ٶتۋ تاعى بٸر پروتسەسس, ٶزدەرٸڭٸز تٷسٸنەسٸزدەر. قىتاي ەلٸنٸڭ ازاماتى بولسا, باسقا ەلدٸڭ ٸشكٸ ساياساتىنا ارالاسۋعا مٷمكٸنشٸلٸگٸمٸز جوق. بٸراق ديپلوماتييالىق ارنالار ارقىلى بٸز ولارمەن تىعىز بايلانىستامىز”, — دەدٸ ول.
“بۇدان بٶلەك, بٸزدٸڭ مينيسترلٸكتەگٸ كونسۋلدىق قىزمەت دەپارتامەنتٸ قىتاي تاراپىمەن جيٸ كونسۋلتاتسييالار ٶتكٸزٸپ جاتىر. مىسالى, وسى اپتانىڭ باسىندا مينيسترلٸك دەلەگاتسيياسى قورعاسقا بارىپ, سول جەردەگٸ قازاقستان-قىتاي شەكاراسىنداعى جاعدايمەن تانىستى. بٸز قىتاي تاراپىمەن كەلٸسٸپ, ٷرٸمشٸگە بارىپ, سول جەردەگٸ كٶپ ماڭىزدى مەسەلەنٸ تالقىلاۋدى جوسپارلاپ وتىرمىز”, — دەپ تٷيدٸ سٶزٸن ەبدٸراحمانوۆ.
23 ماۋسىمدا استانادا ٶتكەن دٷنيەجٷزٸ قازاقتارىنىڭ V قۇرىلتايىندا گەرمانييادان كەلگەن قازاق ەلباسىعا قىتاي ٷكٸمەتٸنٸڭ ونداعى قازاقتارعا قىسىم كٶرسەتٸپ, قانداستارىمىزدىڭ قۇقىقتارىن تاپتاپ جاتقانىن جەتكٸزگەن بولاتىن. نۇرسۇلتان نازارباەۆ بۇل جاعدايدان حابارسىز ەكەنٸن ايتىپ, سىرتقى ٸستەر مينيسترلٸگٸنە مەسەلەنٸڭ انىق-قانىعىن انىقتاۋدى تاپسىرعان ەدٸ.
