Ábdirahmanov ne deidi?
“Bizde úsh-tórt azamattyń naqty aty-jóni, turyp jatqan mekenjailary bar. Osy azamattardyń máselesin olardyń aldynda qoiyp jatyrmyz. Olardan bizge málimet túsip jatyr”, — dedi ministr jýrnalisterge.
Ministr bul máseleniń óte kúrdeli ekenin atap ótti.
“Kúndelikti ainalysamyz. Bul másele boiynsha Qytaidyń syrtqy ister ministrligimen dialog júrgizilýde. Quryltaidan keiin bizge birneshe ótinish kelip túsken, biz ony egjei-tegjeili qarastyryp jatyrmyz. Ol máselelerdiń bárin Qytai tarapynyń aldyna qoiamyz, onyń ishinde Qazaqstanda akkreditatsiiadan ótken Qytaidyń elshiligi bar, Almatyda bas konsýldyǵy bar. Tótenshe jáne ókiletti elshisi de osy máselemen ainalysady, ol kisiniń aldyna da qoiǵanbyz. Halyqaralyq konferentsiia kezinde ózderińiz de ol kisige suraq qoiýǵa múmkindikterińiz boldy”, — dedi Ábdirahmanov.
Ministr bul ózge eldiń ishki máselesi ekenin, sondyqtan aralasýǵa múmkindik joq ekenin aitty. Biraq diplomatiialyq kelissózder júrgizile beredi.
“Elge qaityp kelgen otandastarymyzdyń Qytaidan kelip jatqan týystary bar. Olar áli Qytai azamattary, qazaq azamattyǵyna ótý taǵy bir protsess, ózderińiz túsinesizder. Qytai eliniń azamaty bolsa, basqa eldiń ishki saiasatyna aralasýǵa múmkinshiligimiz joq. Biraq diplomatiialyq arnalar arqyly biz olarmen tyǵyz bailanystamyz”, — dedi ol.
“Budan bólek, bizdiń ministrliktegi konsýldyq qyzmet departamenti qytai tarapymen jii konsýltatsiialar ótkizip jatyr. Mysaly, osy aptanyń basynda ministrlik delegatsiiasy Qorǵasqa baryp, sol jerdegi Qazaqstan-Qytai shekarasyndaǵy jaǵdaimen tanysty. Biz qytai tarapymen kelisip, Úrimshige baryp, sol jerdegi kóp mańyzdy máseleni talqylaýdy josparlap otyrmyz”, — dep túidi sózin Ábdirahmanov.
23 maýsymda Astanada ótken Dúniejúzi qazaqtarynyń V quryltaiynda Germaniiadan kelgen qazaq Elbasyǵa Qytai úkimetiniń ondaǵy qazaqtarǵa qysym kórsetip, qandastarymyzdyń quqyqtaryn taptap jatqanyn jetkizgen bolatyn. Nursultan Nazarbaev bul jaǵdaidan habarsyz ekenin aityp, Syrtqy ister ministrligine máseleniń anyq-qanyǵyn anyqtaýdy tapsyrǵan edi.
