اباي وبلىسىندا ناۋرىز مەيرامى كەڭىنەن اتاپ ءوتىلىپ جاتىر. مەيرامعا ارنايى قۇرىلعان باعدارلامادا: ۇلتتىق ويىندارعا، ءتۇرلى قويىلىمدار، كونسەرتتەر جانە ت.ب. وڭىردە بۇرىن-سوڭدى بولماعان ءىس-شارالار بار.
«بۇگىن مىنە، حاكىم اباي تۋعان توپىراقتا، ۇلىستىڭ ۇلى كۇنى – كەڭ پەيىل، اق نيەت، دوستىق كوڭىل، ەلدىك مۇددە تۇرعىسىنان ەرەكشە اتاپ ءوتىپ جاتىر. ىلايىم، حالقىمىزدىڭ بەرەكەسى ارتىپ، مەرەيى ۇستەم بولسىن! كۇن مەن ءتۇندى تەڭەپ، ىرگەمىزدى ىزگىلىككە بولەگەن ءاز-ناۋرىز بارشامىزعا شاتتىق سىيلاسىن! باعىتى ايقىن، ماقساتى بيىك، تاعدىرى ورتاق اباي ەلىنىڭ ابىرويى اسقاق، مەرەيى ۇستەم بولسىن!»، - دەپ ايماق باسشىسى نۇرلان ۇرانحايەۆ تۇرعىنداردى قۇتتىقتادى.
سەمەيدە ناۋرىزدى اتاپ ءوتۋدىڭ ايرىقشا بەلگىسى ەلدىڭ تاريحي تۇلعالارىنىڭ مەرەيتويلارىنا ارنالعان كيگىز ۇيلەردەن ارنايى اۋىلدار تىگىلدى. مىسالى، «كەنەن ازىربايەۆقا 140 جىل»، «جۇسىپبەك ايماۋىتوۆقا 135 جىل»، «ءىلياس جانسۇگىروۆكە 130 جىل»، «ءابىلحان قاستەيەۆكە 120 جىل»، «الكەي مارعۇلانعا 120 جىل»، «شاكەن ايمانوۆقا 120 جىل»، «بەردىبەك سوقباقپايەۆقا 100 جىل»، «راحىمجان قوشقاربايەۆقا 100 جىل»، «100 ءابدىجامال نۇرپەيىسوۆكە 100 جىل»، «تۇرار رىسقۇلوۆقا 130 جىل»، «قانىش ساتبايەۆقا 125 جىل»، «ساعادات نۇرماعانبەتوۆكە 100 جىل»، «ساكەن سەيفۋللينگە 130 جىل».
بۇدان بولەك وبلىس ورتالىعى تۇرعىندارى مەن قوناقتارىنا ارناپ بىلعارى زاۋىتى، قاراعايلى شاعىناۋدانىندا، اۋەزوۆ الاڭى، تەمىرجول ۆوكزالى الدىندا تەاترلاندىرىلعان قويىلىمدار قويىلادى. قالادا بارلىعى 30 كيىز ءۇي تىگىلدى.
سونىمەن قاتار، ورتالىق الاڭدا قولدانبالى ونەر كورمەسى ۇيىمداستىرىلىپ، بالالار ۇلتتىق ويىن سايىستارىندا ب ا ق سىناستى.
ايتا كەتسەك، ناۋرىز مەيرامىن اباي وبلىسىندا كەڭ كولەمدە اتاپ ءوتۋ جالعاسا بەرەدى. ارنايى ازىرلەنگەن باعدارلاماعا سايكەس ءوڭىردىڭ قالا جانە اۋداندارىندا ءىس-شارالار ايدىڭ اياعىنا دەيىن ۇيىمداستىرىلادى.
