اباي وبلىسىندا «ASSYLTAS» قوعامدىق قورىنىڭ باستاماسىمەن «ارتىق ءبىلىم كىتاپتا» جوباسى جۇزەگە استى. جوبا اياسىندا وبلىستاعى 233 اۋىل مەكتەبىنە جالپى سانى 13 980 دانا كىتاپ جەتكىزىلدى. ءار مەكتەپكە ارنايى ازىرلەنگەن قوراپ ىشىندە 60 ءتۇرلى كىتاپتان قۇرالعان جيناق بەرىلدى، – دەپ حابارلايدى Dalanews.kz اباي وبلىسى اكىمىنىڭ باسپا ءسوز قىزمەتىنە سىلتەمە جاساپ.
بۇل جيناققا قازاق جانە الەم ادەبيەتىندەگى بالالار مەن جاسوسپىرىمدەرگە ارنالعان ۇزدىك شىعارمالار ەنگەن.
جوبانىڭ ماقساتى – اۋىل مەكتەپتەرىنىڭ كىتاپحانالارىن مازمۇندى كىتاپتارمەن تولىقتىرىپ، بالالاردىڭ كىتاپ وقۋعا دەگەن ىقىلاسىن ارتتىرۋ، اباي وڭىرىندە وقۋ مادەنيەتىن دامىتۋ. بۇل باستاما بالالاردىڭ ويلاۋ قابىلەتىن ارتتىرۋعا جانە تىلدىك قورىن بايىتۋعا ىقپال ەتەدى.
كىتاپتار اياگوز قالاسىنان ءوڭىر مەكتەپتەرىنە جونەلتىلدى. اۋداندىق، قالالىق ءبىلىم ءبولىمى باسشىلارى، اۋىل مەكتەپتەرىنىڭ كىتاپحاناشىلارى ەرەكشە قۋانىشپەن قابىلدادى. كىتاپتار تەك تاراتىلىپ قويماي، ولاردىڭ وقىلۋى دا نازاردا بولادى. جىل سوڭىندا وسى جيناقتار بويىنشا وقۋشىلار اراسىندا بايقاۋ ۇيىمداستىرىلىپ، ۇزدىكتەرگە باعالى سىيلىقتار تابىستالادى دەگەن جوسپار بار. بۇل باستاما بالالاردىڭ كىتاپ وقۋعا دەگەن قىزىعۋشىلىعىن ارتتىرىپ، وقۋ جىلىنىڭ سوڭىنا قاراي ەرەكشە سەرپىن بەرەرى انىق.
