«تازا قازاقستان» ەكولوگيالىق اكسياسىنىڭ «جاسىل ايماق» اپتالىعى بورودۋليحا اۋدانىندا باستالدى. اۋداننىڭ «سەمەي ورمانى» اۋماعىندا «سەمەي ورمانى – جاسىل ايماق» اعاش وتىرعىزۋ بويىنشا كەڭ اۋقىمدى اكسيا ءوتتى.

ءىس-شاراعا اباي وبلىسى اكىمى نۇرلان ۇرانحايەۆ، وبلىستىق جانە اۋداندىق ءماسليحات دەپۋتاتتارى، ارداگەرلەر كەڭەسىنىڭ مۇشەلەرى، بەلسەندى جاستار، ستۋدەنتتىك ۇيىمدار، ەڭبەك ۇيىمدارى، سەمەي قالاسى مەن بورودۋليحا اۋدانىنىڭ مەكەمەلەرىنەن 1 000 -نان اسا ادام قاتىستى.

«بۇگىن تۇتاس ەل كولەمىندە كەڭ قولداۋعا يە بولعان «تازا قازاقستان» - ەكولوگيالىق اكسياسى شەڭبەرىندە، وبلىسىمىزدا ەرەكشە ماڭىزى بار شارا وتۋدە. مەملەكەت باسشىسىنىڭ تىكەلەي باستاماسىمەن جۇزەگە اسقان بۇل اكسيانىڭ ارقاسىندا وتانىمىزدىڭ ءار وبلىسى، قالاسى مەن اۋىلى اباتتانىپ، كوشەتتەر وتىرعىزىلىپ، ءوڭىرىمىز جاڭا كەيىپكە ەنىپ كەلەدى. بۇل «اتادان مال قالعانشا، تال قالسىن» دەگەن يگى ءداستۇردىڭ جالعاسى»، - دەدى وبلىس اكىمى نۇرلان ۇرانحايەۆ.

بۇل ناۋقاننىڭ نەگىزگى ماقساتى – كوشەت وتىرعىزۋ ارقىلى ەكولوگيامىزدى جاقسارتىپ، قاراعايلى ورمانىمىزدى جەدەل قالپىنا كەلتىرۋ.

اكسيا بارىسىندا ۆوسكرەسەنوۆكا اۋىلىنىڭ ماڭىنداعى ورمان القابىنداعى 5 گا اۋماقتا 23 مىڭنان استام قاراعاي كوشەتى وتىرعىزىلدى. جالپى «سەمەي ورمانى» رەزەرۆاتىندا «تازا قازاقستان» ەكولوگيالىق اكسياسى باستالعاننان بەرى 50 مىڭنان استام كوشەت ەگىلگەن.

ايتا كەتەيىك، بورودۋليحا اۋدانىنىڭ اۋماعى 698 992 گا جەردى الىپ جاتىر، ونىڭ ىشىندە ورماندى القاپ – 87 773 گا بولسا، سۋ ايدىندارى – 14 301 گا. بيىل اۋدان كولەمىندە 7 مىڭنان استام اعاش كوشەتتەرىن وتىرعىزۋ جوسپارلانۋدا. اعاش وتىرعىزۋ اكسيالارى تۇراقتى تۇردە وتكىزىلەتىن بولادى.