جۇمىسسىزدىققا جول بەرىلمەيدى
– بۇگىندە تابيعي رەسۋرستارعا دەگەن باعانىڭ كۇرت تومەندەۋىنەن عالامدىق داعدارىس كۇشىنە ەندى. وسىنىڭ كەسىرىنەن ۇستىمىزدەگى جىلدىڭ ءبىرىنشى توقسانىندا رەسپۋبليكالىق بيۋدجەتكە ءتۇسۋى ءتيىس 350 ملرد تەڭگە شاماسىنداعى قاراجات تۇسپەيىن دەپ تۇر.
ءبىراق بۇعان قاراماستان مەملەكەت داعدارىسپەن كۇرەسۋ ءۇشىن رەسپۋبليكالىق بيۋدجەتتەن 4،4 ترلن تەڭگە، ياعني 10 ملرد دوللارعا جۋىق قاراجاتتى ءبولدى. بۇل كومەككە سالىقتىق جەڭىلدىكتەردىڭ قاتىسى جوق، – دەدى داۋرەن ابايەۆ.
اقپارات جانە قوعامدىق دامۋ ءمينيسترى قارجىلاي قولداۋ كورسەتۋ كەزىندە ۇلتتىق قوردان قارجى الىنباعانىن اتاپ ءوتتى.
– ەلىمىزدىڭ ەكونوميكالىق الەۋەتى مەن حالىق سانىن قوسا ەسەپتەگەندە كورسەتىلىپ وتىرعان قولداۋدىڭ اۋقىمى زور ەكەنىن باعامداۋعا بولادى. ءوز كەزەگىندە مەملەكەت باسشىسى ەلىمىزدە جۇمىسسىزدىقتىڭ ارتۋىنا جول بەرمەۋگە جانە كارانتين كەزىندە اۋىلدارىنا قايتقان جاستاردى جۇمىسپەن قامتۋدىڭ ماڭىزدىلىعىن ايرىقشا نازار اۋدارىپ وتىر.
بۇدان باسقا «قاراپايىم زاتتار ەكونوميكاسى» ايرىقشا كوڭىل ءبولىنىپ، ەل ەكونوميكاسىنا جاڭا سەرپىلىس بەرۋ دە كوزدەلۋدە، – دەگەن مينيستر ۇكىمەتتىڭ جوسپارى جايىندا ايتىپ بەردى.
6 مىڭ وتانداسىمىز ەلگە ورالدى
ەلىمىزدە توتەنشە جاعداي جاريالانعان ساتتەن بەرى التى مىڭعا جۋىق قازاقستاندىق تۋريستتەر ەلگە ورالىپتى. الداعى ۋاقىتتا سىرت ەلدەردە جۇرگەن 145 وتانداسىمىزدى ەلگە اكەلۋ جوسپارلانۋدا. مەملەكەتتىڭ قولداۋىنا قاراماي ەلگە قايتۋدان باس تارتقان 60 تۋريست شەت ەلدە قالعاندى ءجون ساناپتى.
– ولار شەت مەملەكەتتەرگە شىقپاۋ تۋرالى ەسكەرتۋدى ەلەگەن جوق. وتانىنا ورالعان جەرلەستەرىمىزدىڭ اراسىندا دەمالىس مەرزىمى اياقتالعان اسىقپاي، سودان كەيىن عانا ەلگە كەلۋدى ويلاعان ازاماتتار بولدى. مۇنداي ادامداردى ءوز دەنساۋلىعىنا سالعىرت قاراعان جانداردىڭ قاتارىنا جاتقىزۋعا بولادى. بۇگىندە ىندەتتىڭ بار جوعىن انىقتايتىن تەستتەردىڭ كوپشىلىگى شەت ەلدەردەن كەلگەن تۋريستەرگە كەتۋدە، – دەدى مينيستر.
داۋرەن ابايەۆ ۇكىمەت الداعى ۋاقىتتا كوروناۆيرۋس ينفەكسياسىن جۇقتىرۋشىلار سانى ارتاتىنىن بولجاپ وتىرعانىن جەتكىزدى.
– بىزدەر ىندەت جۇقتىرۋدىڭ شىرقاۋ شەگى الداعى ۋاقىتتا بولادى دەپ بولجام جاساپ وتىرمىز. بۇدان كەيىن كوروناۆيرۋس جۇقتىرعانداردىڭ سانى بىرتىندەپ تومەندەي بەرەدى. الداعى ءبىر ايدا بىزدەر وسى جايتقا كۋا بولامىز.
قازىرگى تاڭدا ەلىمىزدە ءبىر كۇندە 604 مىڭ مەديسينالىق ماسكا شىعارىلىپ جاتىر. جاقىن كۇندەرى ونىڭ كولەمىن 1 ملن داناعا دەيىن جەتكىزبەكپىز. الماتى مەن نۇر-سۇلتان قالاسىندا مەديسينالىق ماسكالار حالىققا تەگىن تاراتىلاتىن بولادى، – دەدى داۋرەن ابايەۆ.
تەست سىناما جەتكىلىكتى
ءمينيستردىڭ ايتۋىنشا قازىرگى تاڭدا ەلىمىزدە Covid-19 ۆيرۋسىن انىقتايتىن 60 مىڭ تەست بار ەكەن. جاقىن كۇندەرى تاعى دا 150 مىڭ تەست الىناتىنىن ونلاين-بريفينگتە مينيستر العا تارتتى.
قاجەتتى سىنامانى الۋدىڭ كەلىسىم-شارتى اياقتالۋعا تاياۋ. سونىمەن قاتار دەمەۋشىلەردىڭ كومەگىمەن ىندەتتى انىقتاۋعا مۇمكىندىك بەرەتىن 100 مىڭ تەست سىناما ساتىپ الىنادى. مۇنىڭ ءبارى ەل ازاماتتارى ءۇشىن تەگىن.
– عالامتوردا «ساپاسى تومەن سىناما ساتىپ الىنۋدا» دەگەن اڭگىمەنىڭ تارالىپ جاتقانىن بىلەمىن. وسى رەتتە ۇلتتىق ساراپتاما ورتالىعى قىتايدا وندىرىلگەن تەست سىنامالاردى قولدانىپ جاتقانىن ايتقىم كەلەدى. بۇل سىنامالار ادامنىڭ ىندەت جۇقتىرعانىن انىقتاۋدا تيىمدىلىگىن كورسەتتى. سىنامالار قىتايدا كوروناۆيرۋسپەن كۇرەس كەزىندە تيىمدىلىگىن كورسەتكەنى بەلگىلى. ال زەرتحانالىق باقىلاۋعا دۇنيەجۇزى دەنساۋلىق ساقتاۋ ۇيىمى ۇسىنعان پرايمەرلەر قولدانىلۋدا، – دەپ مينيستر ءىستىڭ انىق-قانىعىن اشىپ ايتتى.
جۋرناليستەر قانداي سۇراق قويدى؟
ءوز كەزەگىندە داۋرەن ابايەۆ جۋرناليستەردىڭ 22 ناۋرىزدا ەلەكتروندى ۇكىمەتتىڭ سايتىندا (egov.kz) كوروناۆيرۋستىڭ تارالۋ كارتاسى ورنالاستىرىپ، كەيىننەن نە سەبەپتى الىنىپ تاستالىنعانىن سۇرادى.
– اتالعان كارتا جۇرتتى ابىگەرگە سالعانى جاسىرىن ەمەس. جۇرتتىڭ كوپشىلىگى كارتادا كوروناۆيرۋس وشاعى كورسەتىلگەن دەپ سەكەم الىپ قالدى.
شىندىعىندا كارتادا ىندەتكە شالدىققانداردىڭ جانە ولارمەن بايلانىستا بولعانداردىڭ قاي ايماقتا بولعانى كورسەتىلگەن. مۇنى ىندەت وشاعى دەپ شاتاستىرۋعا بولمايدى.
ءتيىستى ورىندار جەدەل ىسكە كىرىسىپ، ىندەت جۇقتىرعان ادامدارمەن بايلانىستا بولعانداردى تەكسەرگەندە ولاردىڭ ۆيرۋس جۇقتىرعانى بايقالمادى. قازىرگى تاڭدا كارتانى كوپشىلىككە تۇسىنىكتى بولۋ ءۇشىن جەتىلدىرۋ ۇستىندە، – دەدى مينيستر.
سونىمەن قاتار داۋرەن ابايەۆ گەرمانيادان «كۋرشيەۆەل – بەرلين – مينسك – الماتى» باعىتى بويىنشا نۇر-سۇلتانعا ۇشىپ كەلگەن جولاۋشىلار جايىندا پىكىر ءبىلدىردى.
– بورت 13 ناۋرىزدا ۇشىپ كەلدى. ۇشاقتا بولعانداردىڭ ءبارى ەمحاناعا جاتقىزىلدى. بورتتا 12 ادام بولسا، ونىڭ 9-ى جولاۋشى، 3ء-ۋى ەكيپاج مۇشەلەرى. ولاردىڭ ءبارى دەر كەزىندە وقشاۋلانىپ، قاجەتتى ەمدەرىن الدى. ۇشاقتى كۇتىپ الۋشىلار ارنايى كيىمدە بولعاندىقتان ولار ەمحاناعا جاتقىزىلعان جوق، – دەدى مينيستر.
جۋرناليستەردىڭ «ىندەت جۇقتىرعاندار اراسىندا شەنەۋنىكتەر بار ما؟» دەگەن ساۋالىنا مينيستر قىسقا جاۋاپ قايىردى.
– ناۋقاستارعا قاتىستى كودەكسكە ساي دارىگەرلىك قۇپيانى ساقتاۋ ماڭىزدى. ءقازىر كىمنىڭ اۋىرىپ جاتقانىن اتاپ كورسەتۋدىڭ قاجەتى جوق، – دەدى داۋرەن ابايەۆ.
23 ناۋرىزداعى مالىمەتكە ساي ىندەت جۇقتىرۋ بويىنشا 62 جاعداي تىركەلدى.
نۇر-سۇلتاندا – 32 جاعداي،
الماتىدا – 26 جاعداي،
قاراعاندىدا – 2 ادام ەم الۋدا.
ال الماتى مەن اقتوبە وبلىسىندا ءبىر-بىر جاعداي تىركەلگەن.
ازىرلەگەن نۇرلان جۇماحان
تاعى وتىرىس:
https://dalanews.kz/51707
