قازاقستاندا تىركەلگەن اۆتوكولىك قۇرالدارىنىڭ سانى 5 ملن 700 مىڭ بولدى، دەپ حابارلايدى Dalanews.kz.
ۇلتتىق ستاتيستيكا بيۋروسىنىڭ مالىمدەۋىنشە، ونىڭ 88،1% – جەڭىل اۆتوموبيلدەر، 9،9% – جۇك اۆتوموبيلدەرى جانە 2% – اۆتوبۋستار.
ايتا كەتەرلىگى، 2024 جىلدىڭ قاڭتار-جەلتوقسان ايلارىندا بارلىعى 1 ملن 836 مىڭ اۆتوكولىك تىركەلگەن. ولاردىڭ باسىم بولىگى جەلتوقسان ايىندا ەسەپكە قويىلعان ەكەن.
سونىمەن قاتار ەلىمىزدە ءالى دە ەسكى كولىكتەر سانى باسىم. رەسمي مالىمەت بويىنشا، 20 جىلدان اسا جۇرىلگەن كولىكتەر سانى – 2 ملن 518 مىڭ اۆتوكولىك بولىپ وتىر. ال شىققانىنا 10-20 جىل بولعان كولىكتەر – 1 ملن 361 مىڭ اۆتوكولىك ەكەنى بەلگىلى بولدى.
وڭىرلەر بويىنشا ەڭ كوپ كولىك الماتى قالاسى (667 مىڭ كولىك) مەن الماتى وبلىسىندا (610 مىڭ كولىك) تىركەلگەن. قازاقستان بويىنشا ديپلوماتيالىق نومىرمەن جۇرگەن 51 مىڭ كولىك بولسا، ءوڭىرى كورسەتىلمەگەن 314 مىڭ تەمىر تۇلپار بار ەكەن.
3-7 جىل ارالىعىنداعى 838،8 مىڭ كولىك تىركەلسە، ءۇش جىلدان اسپاعان جاڭا اۆتوموبيلدەر سانى بار بولعانى 362،6 مىڭ. بۇل – جالپى اۆتوپاركتىڭ نەبارى 6،3%-ىن عانا قۇرايدى.
ەسكە سالايىق، بۇعان دەيىن ق ر سججرا ۇلتتىق ستاتيستيكا بيۋروسىنىڭ دەرەكتەرى بويىنشا قازاقستانداعى اۆتوموبيل ونەركاسىبىنىڭ ءوندىرىس كولەمى 2024 جىلدىڭ ءۇش توقسانىندا 1،2 ترلن تەڭگەنى قۇراعانى تۋرالى جازعان ەدىك. بۇل 2023 جىلدىڭ ءدال وسىنداي كەزەڭىمەن سالىستىرعاندا، 8،5%-عا از بولدى. شىعارىلىم كولەمىنىڭ ءبىرشاما تومەندەۋىنە قاراماستان، اۆتوونەركاسىپ ءالى دە قازاقستاندا ماشينا جاساۋدىڭ نەگىزگى درايۆەرى بولىپ قالا بەرمەك. ماسەلەن، 2024 جىلدىڭ قاڭتار–قىركۇيەك ارالىعىندا اۆتوكولىك قۇرالدارىن ءوندىرۋ ۇلەسى ماشينا جاساۋ سالاسىنىڭ 39،4%-ىن (جانە ەلىمىزدىڭ بارلىق وڭدەۋ ونەركاسىبىنىڭ 7%-ىن) قۇرادى.
وڭىرلەر اراسىندا اۆتوموبيل جاساۋ سالاسىندا كولىك شىعارۋ كولەمىنىڭ جارتىسىنان استامى Allur («سارىارقااۆتوپروم») اۆتوزاۋىتى ورنالاسقان قوستاناي وبلىسىنا عانا تيەسىلى بولدى: 633،8 ملرد تەڭگە. سونىمەن قاتار، ونداعى اۆتوونەركاسىپتىڭ ۇلەسى ماشينا جاساۋدىڭ 84،7%-ىنا جانە وڭىردەگى وڭدەۋ ونەركاسىبىنىڭ بارلىق كولەمىنىڭ بىردەن 46،2%-ىنا جەتتى، ياعني، اۆتوموبيل يندۋسترياسى — وبلىس ەكونوميكاسىنىڭ جەتەكشى جانە ايقىنداۋشى درايۆەرى.
ءوندىرىس كولەمى بويىنشا كەلەسى ورىنعا Hyundai Trans Kazakhstan جانە Hyundai Trans Auto اۆتوزاۋىتتارىمەن الماتى قالاسى جايعاستى: 359 ملرد تەڭگە. ال اۆتوونەركاسىپتىڭ ۇلەسى قالاداعى ماشينا جاساۋدىڭ 69،9%-ىن، ال وڭدەۋ ونەركاسىبىنىڭ 29،4%-ىن قۇرادى.
