“5 mln 700 myń”. Qazaqstanda kólik sany artqanymen, olar eskirip barady

Qazaqstanda tirkelgen avtokólik quraldarynyń sany 5 mln 700 myń boldy, dep habarlaidy Dalanews.kz.

Ulttyq statistika biýrosynyń málimdeýinshe, onyń 88,1% – jeńil avtomobilder, 9,9% – júk avtomobilderi jáne 2% – avtobýstar.

Aita keterligi, 2024 jyldyń qańtar-jeltoqsan ailarynda barlyǵy 1 mln 836 myń avtokólik tirkelgen. Olardyń basym bóligi jeltoqsan aiynda esepke qoiylǵan eken. 

Sonymen qatar elimizde áli de eski kólikter sany basym. Resmi málimet boiynsha, 20 jyldan asa júrilgen kólikter sany – 2 mln 518 myń avtokólik bolyp otyr. Al shyqqanyna 10-20 jyl bolǵan kólikter – 1 mln 361 myń avtokólik ekeni belgili boldy. 

Óńirler boiynsha eń kóp kólik Almaty qalasy (667 myń kólik) men Almaty oblysynda  (610 myń kólik) tirkelgen. Qazaqstan boiynsha diplomatiialyq nómirmen júrgen 51 myń kólik bolsa, óńiri kórsetilmegen 314 myń temir tulpar bar eken.

3-7 jyl aralyǵyndaǵy 838,8 myń kólik tirkelse, úsh jyldan aspaǵan jańa avtomobilder sany bar bolǵany 362,6 myń. Bul – jalpy avtoparktiń nebári 6,3%-yn ǵana quraidy.

Eske salaiyq, buǵan deiin QR SJjRA Ulttyq statistika biýrosynyń derekteri boiynsha Qazaqstandaǵy avtomobil ónerkásibiniń óndiris kólemi 2024 jyldyń úsh toqsanynda 1,2 trln teńgeni quraǵany týraly jazǵan edik. Bul 2023 jyldyń dál osyndai kezeńimen salystyrǵanda, 8,5%-ǵa az boldy. Shyǵarylym kóleminiń birshama tómendeýine qaramastan, avtoónerkásip áli de Qazaqstanda mashina jasaýdyń negizgi draiveri bolyp qala bermek. Máselen, 2024 jyldyń qańtar–qyrkúiek aralyǵynda avtokólik quraldaryn óndirý úlesi mashina jasaý salasynyń 39,4%-yn (jáne elimizdiń barlyq óńdeý ónerkásibiniń 7%-yn) qurady.