بيىلدان باستاپ، ينۆەستورلار ءۇشىن «ءبىر تەرەزە» جۇيەسى جۇمىس ىستەپ تۇر. مۇنداي ورىندار استانا مەن الماتىدا ەكىدەن بولسا، ءار وبلىس ورتالىعىندا بىر-بىردەن بار.

ۇستىمىزدەگى جىلدىڭ 4 ايىندا «ءبىر تەرەزە» جۇيەسىمەن 400 ينۆەستور ۋاقىتىن جوعالتپاي، قۇجاتتىق جۇمىستارىن شەشكەن.  جانە ينۆەستورلاردىڭ قۇقىعىن قورعاۋ ءۇشىن ق ر ينۆەستيسيالار جانە دامۋ ءمينيسترى اسەت يسەكەشيەۆ ينۆەستورلار ومبۋدسمەنى بولىپ قىزمەت ىستەپ وتىر. ومبۋدسمەن قىزمەتى بويىنشا وتكەن جىلى 20 ماسەلە ينۆەستورلاردىڭ پايداسىنا شەشىلىپ، قۇقىقتارى قورعالعان. سونداي-اق، قازاقستان ءۇشىن ماڭىزدى ەكونوميكالىق 19 ەلدىڭ ينۆەستورلارى ءۇشىن  ۆيزاسىز جۇيە ەنگىزىلگەن. ولار: اۆستراليا، ۆەنگريا، يتاليا، موناكو، بەلگيا، يسپانيا، نيدەرلاند، نورۆەگيا، شۆەسيا، مالايزيا، ءباا، سينگاپۋر، ۇلىبريتانيا، اقش، گەرمانيا، فينليانديا، فرانسيا، شۆەيساريا، جاپونيا.

سونداي-اق، ارنايى ەكونوميكالىق ايماقتاردا 148 جوبا ىسكە اسىرىلىپ، 10 مىڭداي ادام جۇمىسپەن قامتىلعان. بۇل جوبالارعا 400 ملرد. تەڭگە قارجى سالىنىپ، ءوندىرىس كولەمى 897 ملرد. تەڭگەگە جەتكەن. قازىرگى تاڭدا 2،6 ترلن تەڭگە قاراجات جۇمسالىپ، 102 جوبا ىسكە اسۋ ساتىسىندا تۇر. مۇنىڭ 23 جوباسى شەتەلدىك ينۆەستورلاردىڭ قاراجاتىنا جاسالىپ جاتىر.

«قمد» اقپارات