الماتىدا 2026 جىلى ناۋرىز ايىندا ىسكە قوسىلاتىن Air Astana اۋە كومپانياسىنىڭ جاڭا توكيو-الماتى تىكەلەي رەيسىنىڭ قارساڭىندا جاپونيانىڭ ەڭ ءىرى تۋروپەراتورلارى قازاقستاندىق تۋريستىك يندۋستريا وكىلدەرىمەن كەزدەستى، دەپ حابارلايدى Dalanews.kz.
ءىس-شارانى «Kazakh Tourism» ۇلتتىق كومپانياسى، Air Astana اۋە كومپانياسى جانە الماتى قالاسىنىڭ تۋريزم باسقارماسى ۇيىمداستىردى. جاپون سەرىكتەستەرىنىڭ بۇل ساپارى قازاقستان مەن جاپونيا اراسىنداعى تۋريستىك ءارى ىسكەرلىك سەرىكتەستىكتى نىعايتۋ جولىنداعى ماڭىزدى قادام بولدى.
كەزدەسۋگە مادەني، تابيعي، پرەميۋم جانە MICE باعىتتارىندا جۇمىس ىستەيتىن توكيونىڭ 10 ءىرى تۋروپەراتورى قاتىستى. B2B فورماتىنداعى كەزدەسۋ بارىسىندا تاراپتار بىرلەسكەن باعدارلامالاردى جۇزەگە اسىرۋ، تۋريستىك ونىمدەردى دامىتۋ جانە الماتىنى «جاپون ساياحاتشىلارى ءۇشىن شىعىستىڭ باۋراپ الاتىن جاڭا ورتالىعى» رەتىندە قالىپتاستىرۋ مۇمكىندىكتەرىن تالقىلادى.
تيان-شان تاۋلارى، شىمبۇلاق كۋرورتى، شارىن شاتقالى سىندى الماتىنىڭ تابيعي كورىكتى جەرلەرى مەن ءداستۇرلى گاسترونوميالىق باعىتتارعا قوناقتار ەرەكشە قىزىعۋشىلىق تانىتتى.
الماتى-توكيو تىكەلەي رەيسىنىڭ 2026 جىلى ناۋرىز ايىندا اشىلۋى قازاقستان مەن جاپونيا اراسىنداعى بايلانىستى دامىتۋدىڭ ماڭىزدى كەزەڭى بولماق. بۇل باعىت ەكى ەل اراسىنداعى ساپاردى جەڭىلدەتىپ، تۋريستەردىڭ ساياحاتتاۋىنا تىڭ سەرپىن بەرەدى. الدىن الا بولجام بويىنشا اۋە رەيسى ىسكە قوسىلعان العاشقى جىلى جاپونيادان 5-7 مىڭعا دەيىن تۋريست كەلۋى مۇمكىن.
«جاپونيا – قازاقستان ءۇشىن ستراتەگيالىق ماڭىزدى نارىق. بۇل ساپار مەن بولاشاق Air Astana رەيسى ەكى ەل اراسىنداعى ءوزارا ىنتىماقتاستىق پەن قىزىعۋشىلىقتى جاڭا دەڭگەيگە كوتەرەدى»، – دەدى الماتى قالاسى تۋريزم باسقارماسىنىڭ وكىلدەرى.
