Almatyda 2026 jyly naýryz aiynda iske qosylatyn Air Astana áýe kompaniiasynyń jańa Tokio-Almaty tikelei reisiniń qarsańynda Japoniianyń eń iri týroperatorlary qazaqstandyq týristik indýstriia ókilderimen kezdesti, dep habarlaidy Dalanews.kz.
Is-sharany «Kazakh Tourism» ulttyq kompaniiasy, Air Astana áýe kompaniiasy jáne Almaty qalasynyń Týrizm basqarmasy uiymdastyrdy. Japon seriktesteriniń bul sapary Qazaqstan men Japoniia arasyndaǵy týristik ári iskerlik seriktestikti nyǵaitý jolyndaǵy mańyzdy qadam boldy.
Kezdesýge mádeni, tabiǵi, premiým jáne MICE baǵyttarynda jumys isteitin Tokionyń 10 iri týroperatory qatysty. B2B formatyndaǵy kezdesý barysynda taraptar birlesken baǵdarlamalardy júzege asyrý, týristik ónimderdi damytý jáne Almatyny «japon saiahatshylary úshin shyǵystyń baýrap alatyn jańa ortalyǵy» retinde qalyptastyrý múmkindikterin talqylady.
Tian-Shan taýlary, Shymbulaq kýrorty, Sharyn shatqaly syndy Almatynyń tabiǵi kórikti jerleri men dástúrli gastronomiialyq baǵyttarǵa qonaqtar erekshe qyzyǵýshylyq tanytty.
Almaty-Tokio tikelei reisiniń 2026 jyly naýryz aiynda ashylýy Qazaqstan men Japoniia arasyndaǵy bailanysty damytýdyń mańyzdy kezeńi bolmaq. Bul baǵyt eki el arasyndaǵy sapardy jeńildetip, týristerdiń saiahattaýyna tyń serpin beredi. Aldyn ala boljam boiynsha áýe reisi iske qosylǵan alǵashqy jyly Japoniiadan 5-7 myńǵa deiin týrist kelýi múmkin.
«Japoniia – Qazaqstan úshin strategiialyq mańyzdy naryq. Bul sapar men bolashaq Air Astana reisi eki el arasyndaǵy ózara yntymaqtastyq pen qyzyǵýshylyqty jańa deńgeige kóteredi», – dedi Almaty qalasy Týrizm basqarmasynyń ókilderi.
