2026 جىلدىڭ 1 قاڭتارىنان باستاپ قازاقستاندا جاڭا سالىق كودەكسى كۇشىنە ەندى. وندا جەكە تابىس سالىعى، سالىقتىق قارىزدى ءوندىرۋ ءتارتىبى، كولىك پەن مۇلىك سالىعىنا قاتىستى ءبىرقاتار ماڭىزدى وزگەرىستەر قاراستىرىلعان. Dalanews.kz رەداكسياسى اتالعان وزگەرىستەرگە بايلانىستى شولۋ جاسادى.
تابىسقا سالىناتىن سالىق
جاڭا كودەكستىڭ باستى وزگەرىستەرىنىڭ ءبىرى تابىس كولەمىنە قاراي سالىناتىن سالىق. بۇدان بىلاي بارلىعى بىردەي مولشەرلەمە تولەمەيدى. جىلدىق تابىسى 8،5 مىڭ اەك-كە دەيىن ازاماتتار 10% سالىق تولەيدى. وسى سومادان اساتىن بولسا، 15% مولشەرلەمە قولدانىلادى.
سالىقتىق شەگەرىمدەر
جاڭا كودەكستە شەگەرىمدەر جۇيەسى قايتا قارالدى. ستاندارتتى شەگەرىم 14 اەك-تەن 30 اەك-كە دەيىن ۇلعايدى، وسىلايشا ايلىعى شامامەن 140 مىڭ تەڭگەگە دەيىنگى ازاماتتار جەكە تابىس سالىعىنان تولىق بوساتىلادى.
الەۋمەتتىك وسال ساناتتار ءۇشىن قوسىمشا جەڭىلدىكتەر قاراستىرىلعان. I جانە II توپتاعى مۇگەدەكتىگى بار ازاماتتارعا ايىنا 5 مىڭ اەك-كە دەيىن شەگەرىم بەرىلەدى. بۇرىنعىداي وقۋ اقىسىن، ەمدەلۋ شىعىندارىن نەمەسە يپوتەكانى قۇجاتپەن دالەلدەۋ قاجەت ەمەس، ورنىنا ءبىرىڭعاي ستاندارتتى شەگەرىم قولدانىلادى. زەينەتاقى مەن ءبىرجولعى الەۋمەتتىك تولەمدەر دە سالىقتان بوساتىلدى.
سالىقتىق قارىزدى ءوندىرۋ ءتارتىبى
قارىز مولشەرىنە بايلانىستى ءارتۇرلى شارالار قولدانىلادى. قارىز 20 اەك-تەن اسپاسا، تەك حابارلاما جىبەرىلىپ، كەشىكتىرىلگەن تولەم ءۇشىن ءوسىمپۇل ەسەپتەلەدى. قارىز 20 اەك-تەن اسسا، شوتتار بۇعاتتالۋى نەمەسە ينكاسسو شارالارى قولدانىلۋى مۇمكىن. قارىز 45 اەك-تەن جوعارى بولسا، مۇلىككە شەكتەۋ قويىلۋى مۇمكىن، ال قارىز 27 000 اەك-تەن اسىپ، 3 ايدان استام ۋاقىت وتەلمەسە، سوت ارقىلى ەلدەن شىعۋعا ۋاقىتشا تىيىم سالىنادى. سالىق ورگاندارى الدىمەن حابارلاما جولداۋعا جانە بورىشكەردى الدىن الا ەسكەرتۋگە مىندەتتى.
قارىزدى كەيىنگە قالدىرۋ نەمەسە ءبولىپ تولەۋ
بەلگىلى شارتتارعا سايكەس، بيزنەس سۋبەكتىلەرى كەپىلسىز جانە بانكتىك كەپىلدەمەسىز سالىقتى كەيىنگە قالدىرا الادى. ۋاقىتشا قارجىلىق قيىندىققا تاپ بولعاندارعا 1 500 اەك-كە دەيىن ءبولىپ تولەۋ قاراستىرىلعان. يمپورتتاۋشىلارعا دا جەڭىلدىك بەرىلدى. وندىرىستە پايدالانىلاتىن شيكىزاتقا ققس تولەۋدى كەيىنگە قالدىرۋعا مۇمكىندىك بار.
اۋىل شارۋاشىلىعىنا ارنالعان جەڭىلدىكتەر
كاسىپكەرلىك نەمەسە فەرمەرلىك شارۋاشىلىقتار ءوز وندىرىسىندەگى اۋىل شارۋاشىلىعى ءونىمىن ساتۋ نەمەسە وڭدەلگەن ءونىمدى وتكىزۋ كەزىندە جەكە تابىس سالىعىن 70% مولشەرىندە ازايتا الادى.
ديۆيدەندتەرگە قاتىستى وزگەرىستەر
بۇرىنعى 30 000 اەك شەگەرىم جويىلدى. ەندى ديۆيدەندتەرگە 5% جانە 15% مولشەرلەمە قولدانىلادى، بۇل كولەمگە بايلانىستى پروگرەسسيۆتى تۇردە ەسەپتەلەدى.
ققس جانە كورپوراتيۆتىك تابىس سالىعى
ققس مولشەرلەمەسى 12%-دان 16%-عا وسەدى، ال ققس بويىنشا مىندەتتى تىركەۋ شەگى 15 ملن تەڭگەدەن 40 ملن تەڭگەگە دەيىن ۇلعايدى. ققس-تەن تەگىن مەديسينالىق كومەكتىڭ كەپىلدەندىرىلگەن كولەمىندەگى قىزمەتتەر، ءمامس اياسىنداعى قىزمەتتەر، وتاندىق كىتاپ باسىلىمدارى مەن باسپا ونىمدەرى بوساتىلادى.
كورپوراتيۆتىك تابىس سالىعىنىڭ نەگىزگى مولشەرلەمەسى 20% بولىپ قالا بەرەدى. ديففەرەنسيالانعان ستاۆكالار ەنگىزىلەدى: بانكتەر مەن ويىن بيزنەسى ءۇشىن ستاۆكا 25%، الەۋمەتتىك سالا ۇيىمدارى ءۇشىن 5%، 2027 جىلى 10%، ال اۋىل شارۋاشىلىعى تاۋار وندىرۋشىلەرىنە 3% مولشەرلەمە قولدانىلادى. سونىمەن قاتار ەلدە پروگرەسسيۆتى جتس مولشەرلەمەلەرى ەنگىزىلەدى.
كولىك سالىعى
جەڭىل اۆتوموبيلدەرگە پايدالانۋ مەرزىمىنە بايلانىستى تومەندەتىلگەن كوەففيسيەنتتەر قولدانىلادى. 10–20 جىلدىق كولىكتەرگە كوەففيسيەنت 0،7، 20 جىلدان اسقان كولىكتەرگە كوەففيسيەنت 0،5 بولادى.
كاسىپكەرلىك (فەرمەرلىك) شارۋاشىلىقتار
ءۇشىن جاڭا كودەكس ءبىرقاتار جەڭىلدىكتەر ەنگىزەدى. مىسالى، ءاربىر شارۋاشىلىققا ءبىر پيكاپ كولىگى سالىقتان بوساتىلادى.
سونىمەن قاتار كولىكتىڭ ءتۇرى ەندى كۋزوۆ بويىنشا ەمەس، تەحنيكالىق پاسپورتتاعى ساناتقا (A، B، C، D) سايكەس انىقتالادى.
اعىمداعى تولەمدەردى ەسەپتەپ، بولەك جىبەرۋدىڭ قاجەتى جوق. سالىق تەك جىلدىق دەكلاراسيا ارقىلى ەسەپتەلەدى جانە ءبىر رەت، جىل سوڭىندا تولەنەدى.
مۇلىك جانە جەر سالىعى
مۇلىك سالىعىنىڭ اعىمداعى تولەمدەرى تەك جىلدىق سالىق سوماسى 1 ملن تەڭگەدەن اسقان جاعدايدا ەسەپتەلەدى. اۋىل شارۋاشىلىعى جەرلەرىن ماقساتسىز پايدالانعان ۋچاسكەلەر ءۇشىن سالىق مولشەرلەمەسى ەكى ەسە ۇلعايتىلادى. جەر قويناۋىن بارلاۋ نەمەسە وندىرۋمەن اينالىساتىن كومپانيالار ءۇشىن جەردى پايدالانۋ تولەمى وسەدى.
