قازاقستاندا ۇلتتىق ءبىرىڭعاي تەستىلەۋ فورماتىن حالىقارالىق ستاندارتتالعان تەستتەرگە سايكەس وزگەرتۋ جوسپارلانىپ وتىر. بۇل تۋرالى ۇكىمەتتەگى بريفينگتە وقۋ-اعارتۋ مينيسترلىگى جوعارى جانە جوعارى وقۋ ورنىنان كەيىنگى ءبىلىم كوميتەتىنىڭ ءتوراعاسى گۇلجان جاراسوۆا مالىمدەدءى، دەپ حابارلايدى Dalanews.kz.
ونىڭ ايتۋىنشا، ءقازىر ۇبت-نى جوعارى وقۋ ورىندارىنا ءتۇسۋ كەزىندەگى نەگىزگى ىرىكتەۋ تەتىگى رەتىندە جەتىلدىرۋ جۇمىستارى ءجۇرىپ جاتىر. قازىرگى فورمات نەگىزىنەن ماتەماتيكالىق جانە اكادەميالىق ساۋات بويىنشا اناليتيكالىق قابىلەتتى باعالاۋعا باعىتتالعان.
"جاساندى ينتەللەكت پەن سيفرلىق تەحنولوگيالار قارقىندى دامىپ جاتقان زاماندا ءبىلىم الۋ تاسىلدەرى دە وزگەرىپ كەلەدى. بۇگىندە تالاپكەرلەر مەكتەپ باعدارلاماسىمەن شەكتەلمەي، ءتۇرلى اقپارات كوزدەرىن پايدالانادى. سوندىقتان ولاردىڭ جوعارى وقۋ ورنىنا قانداي دەڭگەيدەگى اناليتيكالىق جانە سىني ويلاۋ قابىلەتىمەن كەلەتىنىن انىقتاۋ ماڭىزدى"، – دەدى گۇلجان جاراسوۆا.
ۆەدومستۆو وكىلى بيىل ۇبت فورماتى وزگەرمەيتىنىن ناقتىلادى. ال كەلەسى جىلداردان باستاپ تەست تاپسىرمالارى حالىقارالىق ستاندارتتالعان ۇلگىلەرگە بەيىمدەلمەك. بۇل جۇيە جاتتاپ العان ءبىلىم كورسەتكىشىن ەمەس، ونى تاجىريبەدە قولدانۋ داعدىسىن باعالاۋعا مۇمكىندىك بەرمەك.
ونىڭ ايتۋىنشا، جاڭاشىلدىق تالاپكەرلەرگە قوسىمشا جۇكتەمە تۇسىرمەيدى.
