قازاقستان ۇلتتىق بانكى ساراپشىلار قاۋىمداستىعى اراسىندا جۇرگىزىلگەن كەزەكتى ماكروەكونوميكالىق ساۋالنامانىڭ ناتيجەسىن جاريالادى. ساۋالناما 2025 جىلى 7-13 تامىز ارالىعىندا نارىقتىڭ كاسىبي قاتىسۋشىلارى، زەرتتەۋ ينستيتۋتتارى، حالىقارالىق ۇيىمدار، سونداي-اق رەيتينگتىك اگەنتتىكتەر سيپاتىنداعى 13 ۇيىم اراسىندا جۇرگىزىلدى، دەپ حابارلايدى Dalanews.kz.
Cاۋالنامانىڭ نەگىزگى پارامەترلەرى: Brent ماركالى مۇناي باعاسى، ءجىو، ينفلياسيا، بازالىق مولشەرلەمە، تاۋارلار مەن قىزمەتتەردىڭ ەكسپورتى جانە يمپورتى، سونداي-اق تەڭگە باعامى.
ەكونوميكاداعى ءوسىم مەن مۇناي باعاسى
ساۋالناماعا قاتىسۋشى ساراپشىلار بارلىق بولجامدىق كەزەڭدە مۇناي باعاسىنا قاتىستى سەناريي بويىنشا كۇتىلەتىن احۋالدى جاقسارتۋ تۇرعىسىندا قايتا قارادى.
- 2025 جىلعا Brent ماركالى مۇنايدىڭ مەديانالىق باعاسى 1 باررەل ءۇشىن 68،9-دان 69،5 اقش دوللارىنا دەيىن كوتەرىلدى.
- 2026 جانە 2027 جىلدارى دا باعالار ءبىر باررەل ءۇشىن 69،5 اقش دوللارى دەڭگەيىندە تۇراقتانادى دەپ كۇتىلەدى (بۇرىنعى بولجام 2025 جىلى 69،0 جانە 2026-2027 جىلدارى 68،5 اقش دوللارى دەڭگەيىندە بولعان).
قازاقستاننىڭ ەكونوميكالىق ءوسۋ قارقىنى بويىنشا بولجامدار 2025 جىلعا 5،1%-دان 5،2%-عا دەيىن، 2026 جىلعا 4،6%-دان 4،7%-عا دەيىن جوعارى قاراي قايتا قارالدى. 2027 جىلعا ەكونوميكالىق ءوسىم 4،4% دەڭگەيىندە بولادى دەپ كۇتىلەدى.
ينفلياسيا جانە بازالىق مولشەرلەمە
ساۋالناماعا قاتىسۋشىلاردىڭ 2025–2026 جىلدارعا ارنالعان ينفلياسيالىق كۇتۋلەرى جوعارى باعىتقا قاراي ىعىسا ءتۇستى.
- 2025 جىلى ينفلياسيا 11،3% دەڭگەيىندە (بۇرىن – 11،0%)،
- 2026 جىلى 9،5% (بۇرىن — 9،0%) بولادى دەپ بولجانادى.
- 2027 جىلى ينفلياسيالىق قىسىمنىڭ ازايۋىنا بايلانىستى بولجام 7،0%-دان 6،5%-عا دەيىن تومەندەتىلدى.
بازالىق مولشەرلەمە بويىنشا مەديانالىق ماندەر 2025 جىلدىڭ سوڭىنا دەيىن 16،5% دەڭگەيىندە ساقتالادى. 2026 جىلعا بۇل كورسەتكىش 14،0%-دان 14،3%-عا دەيىن قايتا قارالدى. 2027 جىلى ينفلياسيالىق قىسىمنىڭ باسەڭدەۋىنە بايلانىستى مولشەرلەمە 11،8%-دان 11،3%-عا دەيىن تومەندەيدى دەپ كۇتىلەدى.
ۆاليۋتا نارىعى
اتاپ ايتقاندا، ۆاليۋتا نارىعىنداعى قۇبىلمالىلىق بولجامدى باعام بويىنشا كۇتىلەتىن اۋان دەڭگەيىن تاعى دا جوعارىعا ىعىستىردى.
- 2025 جىلعى بولجامنىڭ مەديانالىق ءمانى بويىنشا 1 اقش دوللارى 515،1 تەڭگەدەن 522،8 تەڭگەگە دەيىن، 2026 جىلى 538 تەڭگەدەن 541،5 تەڭگەگە دەيىن ارتتى.
- 2027 جىلى كۇتىلەتىن 1 اقش دوللارىنىڭ باعامى 562،5 تەڭگەگە دەيىن كوتەرىلدى (بۇرىن – 555،8 تەڭگە).
بۇعان دەيىن سايتىمىزدا "جەكە ينۆەستورلار ىنتاسىنىڭ جويىلۋى ەكونوميكاداعى تۇراقتى كەدەرگىلەردى كورسەتەدى - ساراپشى" دەگەن ماقالا جاريالانعان بولاتىن.
