تۇركىستان وبلىسىنىڭ ەلدى-مەكەندەرىن تابيعي گازبەن قامتۋ جۇمىستارى جۇرگىزىلۋدە. سونىڭ ىشىندە تۇلكىباس اۋدانى تولىقتاي كوگىلدىر وتىننىڭ يگىلىگىن كورىپ وتىر.

تولە بي اۋدانىنىڭ كوپتەگەن اۋماعى دا قامتىلۋ ۇستىندە. تاۋ جاعالاي قونىستانعان اۋىلداردىڭ ءبىرازى كومىر جاعۋدان قۇتىلعان. ال وبلىس ورتالىعىنان شالعايدا ورنالاسقان شاردارا قالاسى از عانا ۋاقىتتان كەيىن تابيعي گازدى تۇتىنا باستايتىن بولادى. بۇگىنگى كۇنى گاز تارتۋ جۇمىستارى قارقىندى تۇردە جۇرگىزىلۋدە.

شاردارا قالاسىندا №18 گاز تاراتۋ ستانساسىنىڭ قۇرىلىسى جۇرگىزىلۋدە. اتالمىش قۇرىلىس بىلتىر باستالعان بولاتىن. ودان بولەك 39 شاقىرىم ماگيسترالدى قۇبىر تارتىلدى. اتالمىش قۇرىلىسقا قازىنا قازانىنان 2 ميلليارد تەڭگە قارجى بولىنگەن.

كەلەر جىلى شاردارا قالاسىنا گاز قۇبىرىن جۇرگىزۋ جۇمىستارى تولىقتاي ءبىتۋى ءتيىس. 2020 جىلدان باستاپ گاز كەلەتىن بولادى. الداعى ۋاقىتتا وسى جوبا ناتيجەسىندە شاردارا قالاسى مەن وعان ىرگەلەس 11 ەلدىمەكەن، ياعني، اۋدان تۇرعىندارىنىڭ 55،7 پايىزى تابيعي گازبەن قامتىلماق.

قانشاما جىلداردان بەرى ىس ساسىپ، كومىر جاعىپ كەلگەن اعايىن جاعىمدى جاڭالىققا بەك قۋانىپ وتىر.

قالالىق ىشكى گاز جۇيەسىنىڭ قۇرىلىسى كەزەڭ-كەزەڭىمەن جۇزەگە اسىرىلۋدا. سونىمەن قاتار، قىزىلقۇم، سۇتكەنت، اقالتىن، ەگىزقۇم، دوستىق ەلدى مەكەندەرىنىڭ ىشكى گاز جۇيەلەرى قۇرىلىسىنىڭ جوبالىق-سمەتالىق قۇجاتى ازىرلەنىپ، مەملەكەتتىك ساراپتامانىڭ قورىتىندىسى الىندى. بيىلعى جىلى بۇل جوبانىڭ دا قۇرىلىس جۇمىستارى جۇرگىزىلۋدە. سونىڭ ناتيجەسىندە اۋدان تۇرعىندارىنىڭ تاعى دا 40،6 پايىزى تابيعي گازبەن قامتىلاتىن بولادى.