Tóle bı aýdanynyń kóptegen aýmaǵy da qamtylý ústinde. Taý jaǵalaı qonystanǵan aýyldardyń birazy kómir jaǵýdan qutylǵan. Al oblys ortalyǵynan shalǵaıda ornalasqan Shardara qalasy az ǵana ýaqyttan keıin tabıǵı gazdy tutyna bastaıtyn bolady. Búgingi kúni gaz tartý jumystary qarqyndy túrde júrgizilýde.
Shardara qalasynda №18 gaz taratý stansasynyń qurylysy júrgizilýde. Atalmysh qurylys byltyr bastalǵan bolatyn. Odan bólek 39 shaqyrym magıstraldi qubyr tartyldy. Atalmysh qurylysqa qazyna qazanynan 2 mıllıard teńge qarjy bólingen.
Keler jyly Shardara qalasyna gaz qubyryn júrgizý jumystary tolyqtaı bitýi tıis. 2020 jyldan bastap gaz keletin bolady. Aldaǵy ýaqytta osy joba nátıjesinde Shardara qalasy men oǵan irgeles 11 eldimeken, ıaǵnı, aýdan turǵyndarynyń 55,7 paıyzy tabıǵı gazben qamtylmaq.
Qanshama jyldardan beri ys sasyp, kómir jaǵyp kelgen aǵaıyn jaǵymdy jańalyqqa bek qýanyp otyr.
Qalalyq ishki gaz júıesiniń qurylysy kezeń-kezeńimen júzege asyrylýda. Sonymen qatar, Qyzylqum, Sútkent, Aqaltyn, Egizqum, Dostyq eldi mekenderiniń ishki gaz júıeleri qurylysynyń jobalyq-smetalyq qujaty ázirlenip, memlekettik saraptamanyń qorytyndysy alyndy. Bıylǵy jyly bul jobanyń da qurylys jumystary júrgizilýde. Sonyń nátıjesinde aýdan turǵyndarynyń taǵy da 40,6 paıyzy tabıǵı gazben qamtylatyn bolady.
