ءماجىلىس دەپۋتاتى رينات زايىتوۆ 175 اۋىلدا مەديسينا قىزمەتكەرلەرى حالىققا ۇيدەن قىزمەت كورسەتكەنى تۋرالى اقپاراتقا پىكىر ءبىلدىرىپ، ونداي جاعداي ەلىمىزدە كوپ ەكەنىن ايتتى، - دەپ حابارلايدى Dalanews.kz.
بۇل تۋرالى ول ءماجىلىس دالىزىندە ايتتى.
"ءالى سولاي كوپ جەردە. ءار مەملەكەتتە ونداي پروبلەما بار شىعار. ونىڭ سىلتاۋىن ايتاتىن ادامدار اۋماقتىڭ ۇلكەندىگىن ايتار، باسقاسىن ايتار. سونىڭ الدىن الۋ ماقساتىندا بارىمەن بازار قىلىپ جاتقان ەلگە بارىن جوعالتىپ المايتىنداي بولىسۋىمىز كەرەك. ونىڭ الدىندا ءدارىحانالاردى دا ەۋروپالاندىرۋ دەگەن ۇسىنىس كەلگەن كەزدە قابىلداماي تاستادىق. وعان سەبەپ بولعان - اۋداندىق اۋرۋحانالاردىڭ وعان ساي ەمەستىگى، جابىلىپ قالۋ ءقاۋپى، اۋىلدىق جەرلەردە مۇلدەم بولماۋى"، - دەدى دەپۋتات.
ەسكە سالايىق، بۇعان دەيىن رينات زايىتوۆ "ءبىر اۋىلدا كىشكەنتاي بالانىڭ ءتىسى اۋىرسا، وعان استاناداعى ءمينيستردىڭ جۇرەگى اۋىرۋ كەرەك" دەگەن ەدى.
"كەيدە ءتىپتى كوتەرگەن سۇراعىڭا ورىنسىز سىن تاعىپ، "وسى ماسەلە سەندەر قوزعايتىن تاقىرىپ پا؟ نەگە جوعارىداعىلار ۇساق-تۇيەك ماسەلەلەر قوزعايدى" دەپ جاتادى. ءوز باسىم بۇل سىنمەن كەلىسپەيمىن. سەبەبى ءبىز – ءبىر مەملەكەتپىز! سوندىقتان ۇساق، ءىرى دەمەي، ءار ماسەلەگە بىردەي جۇمىلۋىمىز كەرەك. شالعايدا جاتقان ءبىر اۋىلدا كىشكەنتاي بالانىڭ ءتىسى اۋىرسا، وعان استاناداعى ءمينيستردىڭ جۇرەگى اۋىرۋ كەرەك. جۇمىلا كوتەرسەك، جۇگىمىز جەڭىلدەيدى"، - دەپ ۇندەۋ جاسادى زايىتوۆ.
