10 қаңтарда Қазақстан Республикасының Ұлттық ұланы өздерінің кәсіби мерекесін атап өтті. Осыдан 34 жыл бұрын құрылған әскери құрылым бүгінде елдің қоғамдық қауіпсіздігін қамтамасыз етуде, стратегиялық маңызды нысандарды қорғауда және төтенше жағдайларда азаматтардың қауіпсіздігін сақтауда маңызды рөл атқарып келеді, деп хабарлайды Dalanews.kz

Атаулы күнге орай «Оңтүстік» өңірлік қолбасшылық басқармасында салтанатты жиын өтті. Іс-шара барысында әскери бөлімдердің Ұлттық ұлан құрамындағы елеулі кезеңдерін қамтыған бейнесюжеттер көрсетіліп, жеке құрамға өткен жылдардағы жауынгерлік және қызметтік жолы таныстырылды.

Салтанатты жиында «Оңтүстік» өңірлік қолбасшылығының қолбасшысы генерал-майор Талапкер Әміреев жеке құрамды кәсіби мерекемен құттықтап, әскери қызметшілердің ел қауіпсіздігін қамтамасыз етудегі ерен еңбегін ерекше атап өтті.

— Ұлттық ұлан жауынгерлері — қоғамдық тәртіптің сақшылары, ел тыныштығының тірегі. Сіздердің табанды еңбектеріңіз бен жоғары жауапкершіліктеріңіз мемлекет қауіпсіздігінің берік негізі болып табылады, — деді қолбасшы.

Салтанатты жиында мінсіз қызметімен және жауынгерлік дайындықтағы жоғары көрсеткіштерімен ерекшеленген бірқатар әскери қызметшілер Қазақстан Республикасы ІІМ орынбасары - Ұлттық ұлан Бас қолбасшысының және өңірлік қолбасшының бұйрықтарына сәйкес арнайы төсбелгілермен, алғыс хаттармен және грамоталармен марапатталды.

Айта кетейік, Ұлттық ұланның құрылған күніне арналған салтанатты шаралар «Оңтүстік» өңірлік қолбасшылыққа қарасты барлық әскери бөлімдерде де ұйымдастырылып, жеке құрамға рух беретін мазмұнды іс-шаралар өтті.