Қазақстан Президенті Қасым-Жомарт Тоқаев Конституцияның 30 жылдығына арналған конференцияда әлеуметтік саладағы басты реформалардың нәтижелерін атап өтті,- деп хабарлайды Dalanews.kz

Мемлекет басшысының айтуынша, Конституциялық реформаның арқасында елде «Әділетті мемлекет» қағидатын жүзеге асыруға жол ашылды. Соның ішінде халыққа тиесілі табиғи ресурстардың игілігін қамтамасыз ету мақсатында «Ұлттық қор – балаларға» бағдарламасы іске қосылды.

– Менің тапсырмаммен Ұлттық қордың жыл сайынғы инвестициялық табысының жартысы балалардың арнайы есепшотына жіберілетін болды. Былтырдан бері осы бағдарлама аясында 1,5 миллиард доллардан астам қаржы аударылды. Бұл жас ұрпақтың болашағына сеніммен қарауына мүмкіндік беретін маңызды шешім, – деді Президент.

Тоқаевтың айтуынша, жаңарған Конституция азаматтардың құқықтары мен мүдделерін қорғайтын толыққанды әрі тиімді құралға айналды. Соның нәтижесінде бірнеше маңызды заң қабылданды.

Атап айтқанда, былтыр Адам саудасына қарсы іс-қимыл туралы заң қабылданып, еріксіз некеге итермелеу үшін қылмыстық жауапкершілік енгізілді. Сондай-ақ тұрмыстық зорлық-зомбылық үшін жаза қатаңдатылып, адам ұрлағандарға да қатаң шара қарастырылды.

Бұдан бөлек, қылмыстық сот процесін ізгілендіру және оның тиімділігін арттыру мақсатында тиісті кодекстерге ауқымды түзетулер енгізілді. Конституцияның мерейтойына орай Рақымшылық туралы заң қабылданып, мемлекет қылмыспен күрес пен әлеуметтік әділеттілікті үйлестіре отырып, адамгершілік құндылықтарын басымдыққа қойғанын көрсетті.