16 жастағы Шерзат Болаттың өлімінен кейін және оған ілесе болған оқиғалардан соң Талғар қаласында бірқатар кадрлық ауыс-түйістер болды. Атап айтқанда, 15 қазанда «өз міндеттерін тиісінше орындамағаны үшін» қала әкімі Бақыт Күрішбеков пен оның орынбасары Матан Сағындық қызметтерінен босатылды. Екі айдан кейін, 15 желтоқсанда жаңа әкімді сайлау өтті. Сайлауда Талғар аудандық мәслихатының депутаты, «Amanat» партиясының өкілі және «Талғар Тұрғын Үй» ЖШС-нің бас директоры Арыстанбек Әбілқайырұлы жеңіске жетті. Ол үшін сайлаушылардың 70,5%-ы дауыс берді. Жаңа әкім мен оның жұбайының бизнестері туралы не белгілі?
Shishkin like телеграм арнасының мәліметінше, бұл Талғардағы үшінші әкім сайлауы. Алдыңғы қала әкімі Бақыт Күрішбеков 2022 жылғы 12 маусымда сайланған болатын, оған дейін ол «Аманат» партиясының Талғар аудандық филиалының атқарушы хатшысы қызметін атқарды және дәл осы партия оның кандидатурасын ұсынған еді. Оған дейін Талғар әкімі болып 2021 жылғы 31 қазанда үш шақырылым бойы Талғар аудандық мәслихатының депутаты және хирург-дәрігер Қайрат Исабаев сайланған. Ол 2022 жылғы 5 сәуірде өз еркімен қызметінен кету туралы өтініш жазып, әкімдік креслосынан кетті.
Сайлау комиссиясының мәліметінше, бұл сайлауда сайлаушылардың қатысу деңгейі 30,1%-ды құрады. Бұл 42 774 сайлаушының ішінен 12 875 адам. Кейбір қоғам белсенділерінің айтуынша, алдыңғы сайлаулардағыдай, қатысушылардың саны шамадан тыс көрсетілген.
«Аманат» партиясының өкілі, Талғар аудандық мәслихатының депутаты және «Талғар Тұрғын Үй» ЖШС бас директоры Арыстанбек Әбілқайырұлы 70,5% дауыспен жеңіске жетті. Оның қарсыластарының бірі «Халық партиясының» кандидаты Жәнібек Қаденов 14,6%, ал өзін-өзі ұсынған Бесағаш ауылдық округі әкімінің орынбасары Әлібек Рамазанов 8,9% дауыс жинады. «Барлығына қарсы» 1,4% сайлаушы дауыс берді.
Арыстанбек Әбілқайырұлын бәрі таниды.
Талғардың жаңа әкімі 1983 жылы Алматы облысында дүниеге келген. Ол Алматы аграрлық колледжін тәмамдаған, мамандығы – эколог. Сайлауалды үгіт материалдарында көрсетілгендей, еңбек жолын 2005-2006 жылдары «MAG Group» құрылыс компаниясында бастаған. 2006-2009 жылдары Мемлекеттік тәжірибелік шаруашылықта директордың көмекшісі болып жұмыс істеп, кейін «ПК Марат» ЖШС-не даму жөніндегі менеджер ретінде ауысқан. Компания 2017 жылы Талғарда тіркелген, қауіпсіз қалдықтарды жинаумен айналысады және Хамза Сүлейменовке тиесілі.
Осы компанияда жұмыс істеуінің арқасында Арыстанбек Әбілқайырұлы қала тұрғындары мен жергілікті қоғам белсенділерінің арасында танымал болды. «ПК Марат» – Талғарда қоқыс шығару қызметін көрсететін жалғыз компания. Қаладағы қоқыс контейнерлерінің толып кетуі немесе рұқсатсыз қоқыс орындары мәселелерін шешу үшін тұрғындар оған мессенджер арқылы фото мен мекенжай жіберетін. Ол тұрғындармен кездесулерде компания атынан шығып, экологиялық акциялар мен сенбіліктерге белсенді қатысқан.
Adata.kz деректеріне сәйкес, 2023 жылғы 10 наурызда Арыстанбек Әбілқайырұлы «Талғар Тұрғын Үй» ЖШС-нің бас директоры болып тағайындалған. Бұл бастапқыда жылу энергиясын жеткізуші болған квазимемлекеттік компания. Бүгінде оның қызмет түрі – тұрғын үй құрылысы.
2023 жылғы 19 наурызда Әбілқайырұлы «Аманат» партиясы атынан Талғар аудандық мәслихатының депутаты болып сайланды. Оның сайлауалды науқаны кезінде партиялық ресурстар белсенді қолданылды.
Жаңа әкімнің және оның жұбайының бизнесі.
Adata.kz мәліметтеріне сүйенсек, 2020 жылы Әбілқайырұлы Жаркентте жеке кәсіпкер ретінде тіркеліп, қауіпсіз қалдықтарды жинау және тазалау қызметтерімен айналысқан. Алайда сайлауға аз уақыт қалғанда, 2024 жылғы 24 қарашада оның «Жаркент Тазалық» ЖК есептен шығарылған. Осы уақыт ішінде болашақ Талғар әкімі 212 405 теңге салық төлеген.
Оның жұбайы Айжан Байұзақова, Adata.kz деректері бойынша, анағұрлым табысты кәсіпкер. 2019 жылдан бері оған «Сан-Ай Сервис» ЖК тиесілі, ол да тазалау қызметтерімен, сондай-ақ көтерме және бөлшек саудамен айналысады. Төленген салық сомасы – 3 млн теңгеден асады. Салық аударымдарының күрт өсуі 2022 жылы байқалған, сол кезде ЖК бюджетке шамамен 2 млн теңге төлеген.
Әкімнің жұбайы мемлекеттік сатып алуларға қатысушы: оның кәсіпорнында жалпы сомасы 53 млн теңге болатын 59 келісімшарт бар. Ең ірі тапсырыс беруші – Талғар әкімдігі. 2020-2024 жылдары қала билігі «Сан-Ай Сервис» ЖК-ден 34,6 млн теңгеге қызметтер сатып алған. Сондай-ақ тапсырыс берушілер қатарында Талғар ауданындағы Кендәлін, Алатау, Нұрын ауылдық округтерінің әкімдіктері бар.
Сонымен қатар, «Сан-Ай Сервис» ЖК «ҚТЖ» филиалдарына қызмет көрсеткен. Ашық дереккөздерге сәйкес, 2019 жылы ұлттық компания кәсіпкерге сотқа жүгініп, «Нұрлы жол» теміржол вокзалында 66 автотұрақ орны мен бөлме жалдағаны үшін 3,65 млн теңге қарызын өндіріп алған.
