Бақылау пакеті "ҚазМұнайГазға" тиесілі әрі Қазақстан мұнайын өңдейтін Румыниядағы ірі МӨЗ жұмысшыларының жалақысын инфляция деңгейінен де жоғары индекстеуге келіскен, деп хабарлайды Dalanews.kz.
Мұнай өңдеумен және мұнай химиясымен айналысатын және "ҚазМұнайГаз" (ҚМГ) - KMG International (KMGI) Нидерланд құрылымының 54,63% акциялары тиесілі румындық Rompetrol Rafinare компаниясы өткен жылы кәсіподақтармен келіссөздер жүргізгені белгілі болды. Бұл туралы 2024 жылдың қорытындысы бойынша компания жариялаған баспасөз хабарламасында айтылады.
"Өткен жылдың соңында компания кәсіподақпен барлық қызметкерлердің жалақысын биылғы инфляцияның болжамды деңгейінен де жоғары көтеру, сондай-ақ басқа да жеңілдіктерді арттыру туралы келіссөздер жүргізген. Осылайша, компания өзінің ашықтығын және күрделі экономикалық жағдайға қарамастан барлық жұмысшысы үшін бәсекеге қабілетті жұмыс ортасын қалыптастыруға дайын екендігін көрсетті", - делінген онда.
Rompetrol акцияларының 44,7% - ы Румынияның Энергетика министрлігіне тиесілі.
Бір қызығы, келіссөздер Rompetrol шығынға ұшырап жатқан кезде жүргізілген. 4,9 млрд доллар түсім түскеніне қарамастан, ҚМГ-ның "еншілесі" 2024 жылы 78,4 млн доллар минусқа кеткен. 2023 жылы да Rompetrol 240,5 миллион доллар шығынға ұшыраған, ал осы жағынан алғанда, бұл ретте қандай да бір прогресс сезіледі.
Компания мәліметінше, қаржылық нәтижелерге "Petromidia" МӨЗ-дің 2024 жылдың наурыз-мамыр айлары аралығында жоспарға сай күрделі жөндеу жұмыстарына байланысты тоқтауы, сондай-ақ шикі мұнай мен мұнай өнімдеріне: отынға, биокомпоненттерге әлемдік бағалардың құбылмалылығының артуы сияқты компания қызметіне тәуелді емес факторлар әсер етті. Осылайша, өткен жылдың бірінші жартысында Rompetrol толық қуатында жұмыс істемеді.
Жалпы, Petromidia және Vega МӨЗ-дері 4,9 млн тоннаға жуық қазақстандық мұнайды қайта өңдеді.
"Rompetrol Rafinare" өзінің ең ірі салық төлеуші мәртебесін сақтап қалды және 2024 жылы Румынияның мемлекеттік бюджетіне шамамен 1,53 миллиард АҚШ доллар көлемінде үлес қосты, дегенмен бұл деңгей 2023 жылғысынан төмен, атап айтқанда 1,65 миллиард АҚШ доллардан асады (2022 жылғы 126 миллион АҚШ доллар көлеміндегі ынтымақтастық салығын қоса есептегенде). Компанияның 2024 жылғы төлеміне 2023 жылғы ынтымақтастық салығы және 2024 жылдың алғашқы үш тоқсанындағы тауар айналым салығын білдіретін 11,3 миллион АҚШ доллары кіреді", делінген мұнай өңдеушінің хабарламасында.
Айта кетсек, 2025 жылы ҚМГ-ның Болгариядағы МӨЗ-ді сатып алғалы жатқаны туралы алып-қашпа сөз тарады. Ақыры, компания бұл ақпаратқа қатысты түсініктеме де берді.
