«Интергаз Орталық Азия» 2024 жылы басқарма мүшелеріне 426,1 млн теңге төлеген. Бұл ақпарат Қазақстан қор биржасының (KASE) сайтында жарияланған хабарламада көрсетілген, деп хабарлайды Dalanews.kz.
Жыл бойы басқарма құрамында төрт адам болғанын ескерсек, әр топ-менеджерге орта есеппен ай сайын 8,8 миллион теңгеден келген. Мұнда тек жалақы емес, сонымен қатар бонус пен басқа да төлем түрлері қамтылған. Бұл төлемдердің көлемі мен жиілігі әртүрлі болуы мүмкін.
Компания 2024 жылдың қорытынды есебінде басқарушы персоналға бір жыл ішінде 520,7 миллион теңге төленгенін көрсеткен. Бұл сома басқарма мүшелері мен тәуелсіз директорларға қатысты. 2024 жылғы 31 желтоқсанда олардың жалпы саны сегіз адам болған.
Жыл қорытындысы бойынша төрт басқарма мүшесіне 426,1 миллион теңге төленгенін ескерсек, тәуелсіз директорлар жыл бойы жалпы 94,6 миллион теңге алған.
Қазіргі таңда «Интергаз Орталық Азия» сайтының дерегіне сүйенсек, компанияның директорлар кеңесінде екі тәуелсіз директор бар: Олжас Тлеухабылұлы мен Танбай Наушиев. Соңғысы директорлар кеңесіне 2024 жылдың қазан айында қосылған. Барлығы директорлар кеңесінде алты адам бар, оның ішінде компания басқармасын басқаратын Манас Тасыбаев та бар.
«Интергаз Орталық Азия» 1997 жылғы 1 шілдеде тіркелген. Компания «Самұрық-Қазына» қоры арқылы QazaqGaz-ға 100% тиесілі. Осылайша, компанияның түпкілікті бақылаушысы – Қазақстан үкіметі.
«Интергаз Орталық Азия» компаниясының негізгі қызмет бағыты – табиғи газды тасымалдау, сақтау және газ құбырларына техникалық қызмет көрсету қызметтерін көрсету.
