Қазақстан Президенті Қасым-Жомарт Тоқаев Конституцияның 30 жылдығына арналған конференцияда сот жүйесінде жүргізілген реформалардың нәтижесіне тоқталды,- деп хабарлайды Dalanews.kz

Мемлекет басшысының айтуынша, Конституциялық сот құрылғаннан бері екі жарым жыл ішінде оның қарауына 11 мыңнан астам өтініш түскен.

– Бұл халықтың жаңадан енгізілген конституциялық бақылау институтына сенімі жоғары екенін көрсетеді. Конституцияға қайшы көптеген нормалар құқықтық жүйеден алынып тасталды. Бұдан былай Конституциялық соттың шешімі әділ заңнаманың негізіне айналады, – деді Тоқаев.

Президент сонымен қатар Әкімшілік рәсімдік-процестік кодекстің енгізілуі азаматтардың мемлекетпен арадағы дауларында әділетті шешімдер шығуына ықпал еткенін атап өтті. Оның дерегінше, қазіргі таңда мұндай істердің 60 пайызы азаматтар мен кәсіпкерлердің пайдасына шешіліп жатыр.

Сондай-ақ Мемлекет басшысы сот үкімдерінің әділдігі артқанын, судьяларды іріктеу мен тағайындау рәсімдері ашық өткенін, сот ісін жүргізу цифрландырылғанын айтты.

Тоқаев биыл 1 шілдеден бастап «жаппай кассация» қағидаты енгізілгенін ерекше атап өтіп, бұл қадам сот жүйесін жаңғыртудың маңызды бөлігі екенін жеткізді.

Сонымен бірге, Конституциялық реформа аясында прокуратураның қадағалау өкілеттігі кеңейіп, Адам құқықтары жөніндегі уәкілге конституциялық мәртебе берілді. Енді Омбудсмен де Бас прокурор сияқты Конституциялық сотқа жүгіну құқығына ие болды.