Пәтерін жалға беретін қазақстандықтар декларация тапсыруға міндетті болады, деп хабарлайды Dalanews.kz.

Қыркүйектен бастап елімізде жаппай декларациялауға қатысты жаңа талаптар күшіне енеді. Соған сәйкес шамамен 8 миллион азамат декларациядан босатылады. Бұл санатқа зейнеткерлер, студенттер, үй шаруасындағы әйелдер, жеке кәсіпкерлер және өзге де топтар кіреді.

Қандай өзгеріс енгізілді?

2025 жылы бірқатар қазақстандықтарға салық декларациясын тапсыруға тура келеді. Ол үшін екі түрлі нысан қарастырылған:

250-нысан – кірістер туралы бастапқы декларация;

270-нысан – жыл сайынғы декларация.

Егер азамат бұрын 250 нысанын тапсырмаған болса да, биыл 270 нысанын толтыруға міндеттелуі мүмкін.

Кімді қамтиды?

Бұл талап әсіресе:

пәтерін, гаражын, автотұрақтағы орнын немесе көлігін жалға берушілерге,

бағалы қағаздардан табыс табатындарға,

жеке практикамен айналысатын тұлғаларға қатысты болады.

270 нысанында азаматтар 2024 жылы алған барлық табысын, соның ішінде жалға беруден және бағалы қағаздардан түскен кірістерін толық көрсетуі тиіс.