Қырымбек Көшербаев Қазақстанның Тәуелсіздік жылдарында жеткен жетістіктерін, еліміздің басынан өткерген түрлі қиындықтар мен сынақтар жайында айтып өтті. Мемлекетіміздің нығайып, әлеуметтік-экономикалық дамуына, әлемдік аренада өзіндік орын алуына ҚР Тұңғыш Президенті – Елбасы Нұрсұлтан Әбішұлы Назарбаевтың ерен еңбек сіңіргенін жеткізді. Осындай жасампаз жолды Мемлекет басшысы Қасым-Жомарт Кемелұлы Тоқаев «Сабақтастық. Әділет. Өрлеу» принципімен, «Халық үніне құлақ асатын мемлекет» тұжырымдамасымен лайықты жалғастырып жатқанына тоқталды.
– Тәуелсіздік жылдары еліміздің шекарасы бекемделді. Қазақстан Қарулы Күштерінің қорғаныс қабілеті нығайды. Әлемнің 138 елімен дипломатиялық қарым-қатынас орнаттық. Осы жылдар ішінде еліміздің ішкі жалпы өнімі 17 есе өсті. Біріккен Ұлттар Ұйымы, ЮНЕСКО, Еуропадағы қауіпсіздік және ынтымақтастық ұйымы сияқты ірі халықаралық ұйымдарға мүше болып, төрелік айтып, төріне шықтық. Мемлекетіміз әлем халықтары алдында зор беделге ие болды, – деді Мемлекеттік хатшы.
Бұдан бөлек, Қырымбек Көшербаев Тәуелсіздік жылдарында Қазақстанның жаңа келбеті қалыптасқанын, аз ғана уақытта ғасырға пара-пар іс атқарылғанын жеткізді.
– Осы отыз жылда мемлекет жаңғырып, ұлт қайта түледі. Тәуелсіздік жылдары бой көтерген ғажайып елорда Отанымыздың жүрегіне, Тәуелсіздігіміздің тірегіне айналды. Халқымыз мақтан ететін еліміздің барлық өңірлерінде де ұланғайыр жасампаздық істер атқарылды. Мұның өзі біздің қуатты ел екенімізді паш етті. Сіздердің облыстарыңыз да басқа өңірлер сияқты ел экономикасының дамуына жылдан-жылға үлес қосып келеді, – деді Қырымбек Елеуұлы.
Мерекелік жиында Түркістан облысының әкімі Өмірзақ Шөкеев жұртшылықты Тәуелсіздігіміздің 30 жылдығымен құттықтап, Түркістан өңіріндегі оң өзгерістерге тоқталып өтті. Тәуелсіздіктің ұлы құндылық екенін жеткізді.
Жиында әртүрлі салада мемлекетіміздің мерейін асырып жүрген азаматтар ҚР Президентінің Жарлығымен мемлекеттік наградалармен марапатталды.
Тәуелсіздік мерекесіне арналған кеш Қазақстанның және Түркі елдерінің әншілерінің концерттік бағдарламасына ұласты.
