– Ұстаздар кәсіби мерекесі – бүкіл халықтық мереке. Әлемдегі әр адамға білім беріп, мамандық таңдаумен қатар өмір жолына бағыт беретін – Ұстаз. Ендеше, төл мерекелеріңіз құтты болсын, құрметті ұстаздар! Елбасымыз атап өткендей, қазақстандықтардың ешқашан бұлжымайтын екі ережесінің біріншісі - ұлттық код пен ұлттық мәдениеттің сақталып, рухани жаңғыруды іске асыруда ұстаздардың рөлі бірінші кезекте тұрғаны анық. Бала жүрегіне жол таба білетін, рухани азық беретін де - ұстаз. Тек нағыз ұстаз ғана егемен елге лайықты ұрпақ тәрбиелей алады. Бұған облыс ұстаздарының бүгінгі таңдағы шынайы еңбектері дәлел. Ұстаздарымыздың еңбек жолы - әрдайым жастарымыз үшін өшпес үлгі! – деді Ж.Түймебаев.
Бұдан кейін облыс әкімі ұстаздармен тақырыптық әңгіме, сұрақ-жауап, жаңартылған білім бағдарламасы мен тәжірибе алмасу сынды тақырыптарда сұхбаттасты. Ардагер ұстаздар да өз пікірлерін білдіріп, аймақ басшысының құттықтауына алғыс білдірді.«Бүкіл ұстаздар қауымын мерекелерімен құттықтаймын! Бізде білім беруге барлық жағдай жасалған. Мүмкіндіктер қарастырылған. Балабақшалар да, мектептер мен колледж, жоғары оқу орындары да жеткілікті, – деді ардагер ұстаз Сайлакүл Барахова. – Мықты мамандарымыз да бар. Тек енді жас ұрпаққа сапалы білім беріп, саналы ұрпақ тәрбиелеп шықсақ болғаны. Әрине, ұстаз болу оңай емес. Балаларды да оқыту керек, сапалы білім беру үшін өзің де оқу керексің. Дегенмен, білім министрлігін басқарған азамат облысымызды басқарып отырғанда жаман жұмыс істеуге құқығымыз жоқ» – деп қосты Сайлаукүл Жапбарқызы.
Жиын барысында Жансейіт Қансейітұлы 9 ардагер ұстаз бен 26 мұғалімді алғыс хатпен марапаттады.
Айта кетейік, бүгінде ОҚО-да 638 мың оқушыға 70 мыңға жуық мұғалім сабақ береді. Облыс деңгейіндегі білім саласында ілгерілеушілік бар. Өңірдің дарынды оқушылары республикалық, халықаралық деңгейдегі білім сайыстарында жүлдегер атануда. Жалпы білім беретін пәндерден республикалық олимпиадада облыс командасы бірнеше жыл бойы «Ең үздік олимпиадалық команда» аталымы мен I, III жүлделі орындарды иеленді. Биылғы тамыз кеңесінде тәжірибелі ұстаздарға пәтер кілттері мен білім және ғылым министрлігінің алғыс хаттары, құрмет грамоталары тапсырылды. Сонымен қатар Мақтаарал ауданындағы «Дарын» мектеп-интернаты мен Қазығұрт ауданындағы Ж.Қаппаров атындағы физика-математикалық мамандандырылған мектеп-интернаты республикадағы ең үздік білім ұйымдарының ондығына енді.
ОҚО әкімінің баспасөз қызметі
