Қазақстанда зейнетақы жинақтарымен тіс емдеуге бақылау күшейтілді. Енді науқас емдеудің әр кезеңінде дәрігерлік кеңес беру комиссиясынан өту керек, - деп хабарлайды Dalanews.kz 31-арнаның Информбюро жаңалықтар бағдарламасына сілтеп.
Зейнетақы жинағын емге пайдалану ережелері өзгерді. Енді тіс дәрігерлерінен көмек алу үшін бұрынғыдай тек дәрігерлік комиссия емес, дәрігерлік-консультациялық комиссияның қорытындысын алу қажет. Сомалары көрсетілген екі кезеңді емдеу жоспары стоматологиялық емханамен келісімшартқа қосылуы керек. Бірінші кезең – хирургиялық, екіншісі – ортопедиялық. Біржолғы зейнетақы төлемдері арқылы төлеу емдеу басталғанға дейін жүзеге асырылады.
“Бірінші және екінші кезеңде де дәрігерлік-консультациялық комиссия үшін тіс рентгенін түсіреді. Кейін enpf-otbasy.kz платформасына бекіту үшін әрбір кезең үшін бөлек екі рет комиссия қорытындысын алу қажет болады. Бұл шаралар ашықтықты, қауіпсіздікті және зейнетақы жинақтарының шығыстарын негіздеуді жақсарту үшін енгізіледі”, – делінген хабарламада.
Комиссия құрамында тіс дәрігері болуы керек. Денсаулық сақтау министрлігі мұндай жаңашылдық төлемдерді қолма-қол ақшаға айналдыру көбеюіне байланысты деп түсіндірді.
“Көптеген тіс дәрігері кеңселерді жалға алады, бүкіл емханаларды жалға алады, бір мекемеге лицензияны бір жерден алады, бірақ шын мәнінде олар басқа жерде науқастарды қабылдап, емдейді. Жекеменшік емханаларды ешкім тексермеген. Бұл лицензиялау мәселесін бірінші рет көтеріп отырған жоқпыз. Ол лицензиядан кейінгі болуы керек”, – деді "AL-DENTA" стоматологиялық емханасының директоры Светлана Алексеева.
Сарапшылар да бұл іске дәрігерлік-консультациялық комиссияны тартудың қажеті жоқ деп есептейді.
"Істі қиындатып, өз ақшаңызды алуға кедергі жасаудың қажеті жоқ", – деді Президент жанындағы әйелдер істері және отбасылық-демографиялық саясат жөніндегі ұлттық комиссияның мүшесі Гүлнар Омарова.
Айта кетейік, қазақстандықтар көбіне зейнетақы жинақтарын стоматологиялық қызметтерге ақы төлеуге жұмсайды, өйткені тіс емдеу міндетті медициналық сақтандыру жүйесі арқылы төленбейді.
