Маңғыстау облысында мектеп оқушыларының улану оқиғаларына байланысты Денсаулық сақтау министрлігі алаңдаушылық білдіріп, білім беру ұйымдарындағы тамақтану жүйесіне түбегейлі өзгеріс енгізілетінін мәлімдеді, деп хабарлайды Dalanews.kz.

Үкімет отырысында сөз сөйлеген Денсаулық сақтау министрі Ақмарал Әлназарова:

"Маңғыстау облысында орын алған оқушылардың улануы – балаларға арналған мекемелердегі тамақтану жүйесін түбегейлі қайта қарау қажеттігін көрсетті. Осыған орай, министрлік мемлекеттік бақылауды күшейтетін жаңа тәсілдерді әзірлеп отыр", – деді.

Ұсынылып отырған негізгі өзгерістер:

• Балалар баратын мекемелерге ерекше мәртебе беріледі;

• Тексеру туралы алдын ала хабарлама таратылмайды;

• Санитарлық талаптарды бақылау үшін мониторингтік сапарлар енгізіледі.

2025 жылдың 1 қыркүйегінен бастап білім беру мекемелерінде дұрыс тамақтануға арналған жаңа ұлттық стандарт күшіне енеді. Бұл стандарт семіздік, қант диабеті, жүрек-қан тамырлары ауруларының алдын алуға бағытталады.

Жаңа талаптарға сәйкес:

• Қант мөлшері – 3,6 есе,

• Тұз мөлшері – 5 есе азайтылады.

Бұл көрсеткіштер келесідей нәтижеге қол жеткізуді көздейді:

• Балалардағы семіздікті 15%-ға,

• Қант диабетін 20%-ға,

• Артериялық гипертензияны 18%-ға төмендету.

Сондай-ақ асханасы жоқ шағын мектептер үшін жеке мәзір ұсынылады. Сонымен қатар алғаш рет "Жеуге жарамсыздық индексі" атты жаңа жүйе енгізіледі. Ол балалардың қаншалықты тамақ ішкенін және тағам қалдығының деңгейін бағалауға мүмкіндік береді.

Қазіргі уақытта бұл жаңа стандартты түсіндіру мақсатында өңірлік басқармалар, мектеп әкімшілігі мен жеткізушілердің қатысуымен оқыту семинарлары өткізілуде. Стандарттар мектептер мен балабақшаларға бірдей қолданылады.