Алматы қалалық өңірлік коммуникациялар қызметінде өткен брифингте Түрксіб ауданының әкімі Бақытжан Ақжаров 6-квартал тұрғындарының шағымына қатысты пікір білдірді. Тұрғындар президентке жүгініп, үйлерінің сүрілетіні туралы алдын ала ескертілмегенін және инженерлік желілердің өшірілгенін айтқан, деп хабарлайды Dalanews.kz Informburo агенттігіне сілтеме жасап.
Толстой – Молдағалиев – Ақан Сері – Спартак көшелерімен шектелген аумақ тұрғындары болып жатқан жағдайды “реконструкция деген желеумен жасалған заңсыздық” деп атады. Олардың айтуынша, үйлер сот шешімінсіз сүріле бастаған, коммуникациялар тоқтатылған, ал үйлер электронды картадан мүлде жоғалып кеткен. Кейбір тұрғындар қоныс аударуға келісім бермегенін мәлімдеген.
Аудан әкімінің айтуынша, бұл аумақтағы 100-ден астам пәтердің 90-нан астамы көшірілген. Қазіргі таңда 6-9 меншік иесі ғана қалды, онымен келіссөздер жалғасуда. Жобаны Капиталдық құрылыс кәсіпорны (КҚК) құрылыс компаниясы мен инвестор бірлесіп жүзеге асыруда.
“Тұрғындардың келісімі – басты шарт. Көпшілігі жаңа үйлерге көшіп кетті. Ал қалғандарымен жеке сөйлесіп жатырмыз. Олардың өз талаптары бар: бірі көбірек бөлме сұрайды, бірі – бірінші не екінші қабаттан болсын дейді. Алайда мұның бәрін бірдей орындау мүмкін емес”, – деді Ақжаров.
Ол жаңа пәтерлердің көбіне аздап кеңірек болатынын және толық әрленіп берілетінін айтты. Алайда дау тудыратын жағдайлар да бар. Мәселен, кейбір тұрғындар жаңа үйдің жалпы аумағы үлкен болғанымен, тұрғын бөлмесі тарлау екенін айтып наразы. Басқалары лифті жоқ үйдің алтыншы қабатына көшкісі келмейді.
“Әр жағдайды жеке қарастырамыз. Келіңіздер – КҚК өкілдерін шақырып, бәрін егжей-тегжейлі талқылаймыз. Ешкімді мәжбүрлемейміз, келіспесеңіз – қол қоймауға толық құқығыңыз бар”, – деп сендірді әкім.
Коммуникациялардың өшірілуі жөніндегі сұраққа Ақжаров коммуналдық қызметтерден ресми хабар түспегенін, алайда апаттық жағдайға байланысты уақытша үзілуі мүмкін екенін айтты.
Тұрғындар үйлерінің айналасы қоршаумен қоршалғанын да сынға алған. Әкім бұл ақпаратты растады: қоршау тек тұрғындар көшіп кеткен учаскелерде ғана орнатылған.
