Әлеуметтік желіде Ақтау Каспий технологиялар және инжиниринг университетінің (Yessenov University) студентімін деген видео авторы мекеме әкімшілігі тарапынан сыбайлас жемқорлық, қудалау және заңсыздықтар жасалып жатқанын мәлімдеді. Бұл туралы Telegram арнада айтылды. Ал Yessenov University баспасөз қызметі өкілі студенттің үндеуіне пікір білдірді, - деп хабарлайды Dalanews.kz.
Cтудент видеода бірқатар мәселені айтқан.
"Ш.Есенов атындағы Каспий технология және инжиниринг университетінің студентімін. Мен айтатын мәселе - осы университеттің студенттері арасында өте өзекті тақырып", - деді ол.
Оның сөзінше, сондай мәселенің бірі екінші семестрде түскен студенттерге қатысты.
"Оларға университетке ауысқан кезде соманың жартысын - 300 мың теңгені ғана төлейтінін айтады. Сонымен қатар, олардың қарызы болмайтыны да айтылады. Бірақ оқу жылының соңында олар болмайды деп уәде берген қарыздар бар болып шығады. Осылайша олар бір ай ішінде қарыздарын жабуы керек. Сондықтан біздің университетте мұндай қарыздары барын білмейтін студент өте көп. Негізінен, мұндай студенттер - басқа елдердің азаматтары", - деді ол видеода.
Сондай-ақ, студент университетте кейбір пәндер семестрдің ортасында қосылатынын айтты.
"Бұл жағдай бірінші рет болып отырған жоқ. Оқытушылардың студенттермен қарым-қатынасы - тағы бір мәселе. Кейбір аудиториялар жертөледе орналасқан, онда желдету құрылғысы жоқ, демалатын ештеңе жоқ. Дәріс барысында тақырыпты түсіндіруге уақыт жеткіліксіз", - дейді студент.
Yessenov University студенті оқытушылардың кейбір қылықтарына да шағымданды.
"Денешынықтыру пәні оқытушыларының студенттерге қатыгездікпен қарауы. Әсіресе, ер мұғалімдер өз міндеттерін елемей, студенттерді әдепсіз қимылдар жасауға мәжбүр етеді", - деді ол.
Сонымен қатар, үндеу авторының сөзінше, бұл уақытта олар қыздардың дене мүшелеріне қол тигізеді.
"Олардың кейбіреулері студенттерден пара сұрайды. Сонымен қатар, дене шынықтыру пәнінің мұғалімдері біздің оқудан шығуымызға себеп болуы мүмкін екенін айтып қорқытады", - деді ол өз үндеуінде.
Студенттің сөзінше, факультет басшылары студенттердің мәселелеріне қызығушылық танытпайды.
Yessenov University баспасөз қызметі өкілі видео авторының үндеуіне пікір білдірді.
"Бізге мұндай шағыммен студент жүгінбеді. Қазір оның қандай факультеттен екенін және біздің университеттің студенті ме, жоқ па, білмейміз. Бірақ ішкі тергеу басталды. Студенттер арасында сауалнама жүргізіледі", - деді ЖОО баспасөз қызметі өкілі lada.kz-ке жауабында.
Университеттің баспасөз қызметі өкілдері оқу орнында ашық өтініш жүйесі бар екенін және анонимді шағым берудің көптеген жолы бар екенін жеткізді.
"Біздің университетте сыбайлас жемқорлыққа қарсы қызмет, студенттік парламент, әлеуметтік желілер, ректор блогы, кураторлар бар. Студент анонимді түрде шағымданып, өз проблемасын айта алады", - деді ол.
