Ақмола облысында кәсіпкер мемлекеттен заңсыз қудалаудың салдарынан келтірілген шығын үшін шамамен 40 миллион теңге өндіріп алған. Алайда ол бұнымен тоқтамай, қосымша 14 миллион теңге өтеуді сұрады. Алайда апелляциялық сот оның шағымын қанағаттандырмады, деп хабарлайды Dalanews.kz. 

Оқиға 2019 жылдың күзінде басталған. Коммерциялық компания мен шаруа қожалығының басшысы ұйымдасқан қылмыстық топқа қатысы бар және бөтен мүлікті иемденді деген күдікпен тергеуге алынған.

2020 жылдың қыркүйегінен 2023 жылдың шілдесіне дейін кәсіпкер үйқамақта болды. 2021 жылы оның компаниясы банкрот деп танылып, 2023 жылы жер пайдалану құқығын ұзартуға өтініші кеш берілгендіктен, одан да айырылған.

2023 жылдың соңында қылмыстық іс құрам болмағандықтан тоқтатылды. Осыдан кейін кәсіпкер полиция мен Қаржы министрлігінен заңсыз қудалаудан келген материалдық және моральдық шығынды өтеуді талап етті.

Сот зейнетақы қорынан алынған деректерге сүйене отырып, кәсіпкердің үйқамақта болған кезеңде 16,8 миллион теңге еңбекақы жоғалтқанын есептеп шығарды. Сонымен қатар, моральдық зиян ретінде 9 миллион теңге, ал адвокат қызметіне жұмсалған шығын ретінде 14 миллион теңге төлеуді мемлекетке міндеттеді.

Алайда кәсіпкер бұл шешіммен келіспей, апелляциялық шағым түсірді. Ол адвокатқа 28 миллион теңге жұмсағанын айтып, толық өтем талап етті. Бірақ облыстық сот бастапқы сот шешімін өзгеріссіз қалдырды.

"Бірінші сатыдағы сот заңсыз қудалаумен материалдық шығын арасындағы себеп-салдарлық байланысты дұрыс анықтады. Ал адвокаттық қызмет көрсету туралы келісімшартта екі бөлек қызмет көрсетілетіні жазылған — біреуі қылмыстық іс бойынша, екіншісі азаматтық істегі заңды тұлғаның мүддесін қорғау. Адвокат тек қылмыстық іс бойынша жұмыс атқарған", – деп түсіндірді облыстық сот алқасы.