Абай облысында өрттің алдын ала болжамы бойынша 1200 гектардан астам аумақ жанып кетті. Оның ішінде 800 гектар дала, ал 400 гектар орман алқабы. Бұл туралы бүгін Абай облысының әкімдігі мәлімдеді, деп хабарлайды Dalanews.kz.
Әкімдік деректеріне сәйкес, Абай, Шығыс Қазақстан және Павлодар облыстарының Төтенше жағдайлар департаменттері, облыстық Полиция департаменті, сондай-ақ "Семей орманы" мен "Ертіс орманы" мекемелерінің қызметкерлері мен жергілікті атқарушы органдар жағдайды бақылауда ұстап отыр. Қарағанды облысы мен Астана қаласынан қосымша күштер мен техника көмекке жіберілді.
Абай облысының әкімі Берік Уәли Төтенше жағдайлар министрлігінің өкілдерімен бірге таңертең өрттен зардап шеккен Морозов филиалының Соснов орманшылығына тікұшақпен әуеден бақылау жүргізді.
"Тікұшақпен өртенген аумақтарды мұқият қарап шықтық. Өрттің толық тоқтатылғанын және елді мекендер мен тұрғындарға қауіпсіздіктің қамтамасыз етілгенін тексердік", – деді аймақ басшысы.
Өртті сөндіруге 419 адам мен 140-қа жуық техника жұмылдырылды. Өрттің шығуына Қоянбай ауылының маңындағы құрғақ шөптің жануы және қатты желдің әсері себеп болды. Жауын-шашын болмаған жағдайда жағдай әлі де бақылауды қажет етеді.
