2025 жылғы 1 шілдеден бастап екінші деңгейдегі банктер, шетелдік банктердің филиалдары, "Қазақстанның Даму банкі" АҚ және Ұлттық почта ҚР Ұлттық Банкіне банк шоттарының иелері туралы мәліметтерді ұсынып отыратын болады, деп хабарлайды Dalanews.kz.
Мұндай талап ҚР Ұлттық Банкінің 2025 жылғы 22 мамырдағы №26 қаулысында қарастырылған.
Оған сәкес, коммерциялық банктер Ұлттық Банкке есептіліктің мынадай түрлерін ұсынуға тиіс:
- Банктік шот (салым) иесі туралы деректерді алған немесе өзгерткен күннен бастап 10 жұмыс күні ішінде;
- Банктік шот (салым) шарты туралы есеп, ол да 10 жұмыс күні ішінде ұсынылады;
- Банктік
- шот туралы есеп, ол да 10 жұмыс күні ішінде ұсынылады;
- Банктік шот бойынша операциялар туралы есеп ай сайын тапсырылады, оны кейінгі айдың оныншы жұмыс күнінен кешіктірмей ұсынады.
Банктік шот иесі туралы есепте мыналар көрсетіледі:
- оның иесі кім: жеке немесе заңды тұлға ма;
- туған жылы;
- жынысы;
- азаматтығы;
- тұрғылықты жері және т. б.
Банктік шот шарты туралы есепте мыналар көрсетіледі:
- салым сомасы;
- салым қай валюта екендігі;
- салымды орналастыру мерзімі;
- пайыздық мөлшерлеме;
- мерзімінен бұрын алу мүмкіндігі;
- мульти валюта ма;
- шот ашу кезінде делдалдың болуы және т. б.
Операциялар туралы есепте есепті кезеңдегі шоттағы ақшаның барлық қозғалысы туралы ақпарат көрсетіледі:
- түсімдер сомасы;
- қаражаттың басқа жаққа аударылуы (шығарылуы);
- есептелген пайыздар сомасы;
- қалдық сома және т. б.
"Жеке тұлғалар және ЖК туралы ақпаратты беру кезінде олардың ЖСН-ы дербес емес нөмірге (ДСН), ал ТАӘ банк шотының иесін сәйкестендіретін кодқа (ЖСН) өзгертілетін болады. Бұл жеке деректерді қорғау үшін жасалады. Алайда, Қаржы нарығын реттеу және дамыту агенттігінің (ҚНРДА) сұранысы бойынша шот иесі туралы сәйкестендіру деректерін жария ету қорғалған байланыс арналары арқылы берілуі мүмкін екенін ескеру маңызды. Бұл шара қаржы ағындарын бақылау, кірістерді жылыстатуға қарсы күрес және банк саласындағы ашықтықты арттыру үшін қабылданды", делінген реттеуші орган хабарламасында.
