Qazaqstanda 470 myńnan astam adam ziiandy jáne qaýipti eńbek jaǵdailarynda jumys isteidi, dep habarlaidy Dalanews.kz.
Ministrliktiń málimetinshe, 2024 jyly 679 myń qyzmetker ziiandy eńbek jaǵdailary úshin túrli ótemaqylar aldy. Bul maqsatqa jumys berýshiler 297,4 milliard teńge bólgen, bul 2023 jylmen salystyrǵanda 16,6 paiyzǵa kóp.
2024 jyldyń 1 qańtarynan bastap Qazaqstanda ziiandy eńbek jaǵdailarynda jumys istegen qyzmetkerlerdi áleýmettik qorǵaý úshin arnaiy tólem engizildi. Bul tólemdi alý úshin qyzmetkerdiń jasy 55-ke tolýy jáne mindetti kásiptik zeinetaqy jarnalary keminde jeti jyl boiy tólenýi tiis. Búgingi tańda 14 myńnan astam qyzmetker ziiandy eńbek jaǵdailaryndaǵy jumysyn toqtatyp, arnaiy tólem alyp jatyr.
Qazaqstan kásiporyndarynda jyl saiyn 1400-den astam jazataiym oqiǵa tirkeledi, onyń shamamen 200-i ólimmen aiaqtalady. Jazataiym oqiǵalardyń eń kóp tirkeletin salalary – taý-ken metallýrgiia kesheni (15,3%) men qurylys salasy (12%). 2024 jyldyń qorytyndysy boiynsha quqyq qorǵaý organdaryna 1042 jazataiym oqiǵa týraly material joldanyp, olardyń negizinde 215 qylmystyq is qozǵaldy. Elimizde 7,7 myńnan astam óndiristik nysanǵa attestatsiia júrgizildi.
