Qazaqstanda 2026 jyldyń qańtar–maýsym ailary aralyǵynda munai men gaz óndirý kólemi ótken jyldyń sáikes kezeńimen salystyrǵanda tómendegen. Bul týraly Ulttyq statistika biýrosy jariialaǵan ónerkásip kórsetkishterinde aitylǵan, dep habarlaidy dalanews.kz.
Resmi derekke sáikes, alty aida elde 45,6 mln tonnadan astam munai óndirilip, bul byltyrǵymen salystyrǵanda 8,4 paiyz azaiǵan. Sondai-aq gaz óndirý kólemi 4,4 paiyz tómendep, 31,3 mlrd tekshe metrdi qurady.
Ulttyq statistika biýrosy óndiris kóleminiń tómendeý sebepterin naqtylamaǵan. Al Energetika ministrliginiń málimetinshe, buǵan Orynbor gaz óńdeý zaýytyna gaz jetkizýdiń qysqarýy, jyl basynda Teńiz ken ornyndaǵy apattyń saldary jáne Qazaqstan munaiynyń shamamen 80%-y eksporttalatyn Kaspii qubyr konsortsiýmy (KQK) júiesindegi qiyndyqtar áser etken.
Soǵan qaramastan, munai ónimderiniń jekelegen túrleri boiynsha óndiris kólemi artty. Atap aitqanda, kerosin óndirisi 13% ósip, 400 myń tonnaǵa jetse, dizel otynynyń óndirisi 2,7%-ǵa artyp, 3,2 mln tonnany qurady. Sondai-aq benzin óndirisi 1,4% ulǵaiyp, 3,04 mln tonnaǵa jetti. Al mazýt óndirisi, kerisinshe, 31,4%-ǵa qysqaryp, 700 myń tonnany qurady.
Sarapshylardyń aitýynsha, elde janarmaiǵa degen suranys artyp keledi. Osyǵan bailanysty Qazaqstan úsh iri munai óńdeý zaýytyn kezeń-kezeńimen jańǵyrtyp jatyr. Josparǵa sáikes, 2033 jylǵa qarai eldegi munai óńdeý kólemi jylyna 40 mln tonnaǵa deiin ulǵaitylyp, qosymsha qýattylyǵy jylyna 10 mln tonna bolatyn jańa munai óńdeý zaýyty salynbaq.
